यी हुन् विश्वकपका उत्कृष्ट रंगशाला

तीन देशका १६ सहरमा जारी सन् २०२६ को विश्वकपले फुटबलप्रेमीलाई विश्वकै केही उत्कृष्ट रंगशाला अवलोकन गर्ने अवसर दिएको छ।

मेक्सिकोको ऐतिहासिक एज्टेका रंगशालादेखि प्रतियोगिताको फाइनल हुने न्युयोर्कको न्यु जर्सी रंगशालासम्म खेलाडी, समर्थक र पत्रकारहरूले नयाँनयाँ रंगशालाको अनुभव लिएका छन्।

बीबीसी स्पोर्ट्सका संवाददाताले मेक्सिको, अमेरिका र क्यानडाका आफ्ना अनुभव यसरी सुनाएका छन्।

एज्टेका रंगशाला (मेक्सिको)

एज्टेका भनेको फुटबल इतिहासले भरिएको रंगशाला हो। आधुनिकीकरण गरिए पनि सन् १९७० को विश्वकप फाइनलमा ब्राजिलका कार्लोस अल्बर्टोले गरेको ऐतिहासिक गोल र सन् १९८६ मा डिएगो म्याराडोनाले रचेको जादु यही मैदानमा भएको थियो। मैदान हेर्दा पुराना टेलिभिजन प्रसारणमा देखिने त्यही चमक अझै पनि देखिन्छ। उद्घाटन खेलमा मेक्सिकन समर्थकहरूको जोश, उनीहरूले उछालेका सोम्ब्रेरो टोपीहरूको दृश्य अविस्मरणीय थियो। यस विश्वकपमा यसभन्दा राम्रो मञ्च अर्को नहुन सक्छ।

बोस्टन रंगशाला

यो रंगशाला एनएफएल टोली न्यु इङ्गल्यान्ड प्याट्रियट्सको घरेलु मैदान हो। उच्च ढल्केका दर्शकदीर्घाका कारण जुनसुकै सिटबाट पनि उत्कृष्ट दृश्य देखिन्छ। पत्रकारका लागि रणनीतिक विश्लेषण गर्न त सहज छ तर खेलाडी चिन्न भने निकै गाह्रो। यति टाढाबाट त एर्लिङ हालान्ड पनि कमिलाजस्तै देखिन्छन्। रंगशालाभित्रको वातावरण राम्रो भए पनि प्रवेशद्वारको संकेत प्रणाली विश्वकपकै सबैभन्दा कमजोर छ।

डलास रंगशाला

डलास रंगशाला अत्यन्त आधुनिक र सुविधासम्पन्न छ। छाना बन्द राखिने भएकाले वातानुकूलित वातावरण खेलाडी र दर्शक दुवैका लागि निकै सहज छ। उच्च दर्शकदीर्घाले उत्कृष्ट माहोल सिर्जना गर्छ भने फराकिला मार्गले दर्शकलाई सहज रूपमा हिँडडुल गर्न मद्दत गर्छ। विशाल डिजिटल स्क्रिनहरू प्रभावशाली छन्। पत्रकार कक्ष पनि निकै सुविधासम्पन्न छ र खुला झ्यालबाट मैदानको वातावरण महसुस गर्न सकिन्छ। रंगशालामा आउजाउ गर्न पनि निकै सहज छ।

क्यान्सस सिटी रंगशाला

रंगशाला खुला आकाशमुनिको उत्कृष्ट मैदान हो। यहाँको प्रसिद्ध टेलगेटिङ संस्कृति खेलअघि पार्किङ क्षेत्रमा खाना पकाएर रमाइलो गर्ने परम्परा अमेरिकाकै उत्कृष्टमध्ये एक मानिन्छ। अर्जेन्टिनाले अल्जेरियामाथि ३-० को जित निकाल्दा लियोनल मेस्सीले ह्याट्रिक गरेका थिए। सूर्यास्तको दृश्य, समर्थकहरूको ऊर्जा र मेस्सीको ऐतिहासिक प्रदर्शनले त्यो दिन अविस्मरणीय बनायो।

न्यु जर्सी र एटलान्टा रंगशाला

एटलान्टा रंगशाला समग्र दर्शक अनुभवका हिसाबले अझ उत्कृष्ट छ। यसको काँच र स्टिलले बनेको बाहिरी संरचना आकर्षक छ भने भित्रको गोलाकार विशाल स्क्रिन निकै विशेष छ।

फिलाडेल्फिया रंगशाला

फिलाडेल्फियाले विश्वकपलाई खुलेर स्वागत गरेको देखिन्छ। विश्वप्रसिद्ध रकी मूर्तिसामु विश्वभरका समर्थकहरूको भीड लागेको थियो। ब्राजिल र हैटीबीचको खेलमा रंगशालाको वातावरण अत्यन्त उत्साहपूर्ण थियो। यहाँ पनि टेलगेटिङको सुविधा भएकाले समर्थकहरूले खेलअघि नै उत्सव मनाउने अवसर पाउँछन्।

सियाटल रंगशाला

सहरको केन्द्रमा रहेको यस रंगशालाबाट एकातिर सियाटलका अग्ला भवन र अर्कोतिर हिउँले ढाकिएको माउन्ट रेनीयर हिमाल देखिन्छ। दुईतर्फको घुमाउरो छानाले दर्शकको आवाज मैदानतर्फ फर्काउने भएकाले वातावरण अत्यन्त रोमाञ्चक हुन्छ।कहिलेकाहीँ त रंगशाला नै हल्लिएको महसुस हुन्छ।

सियाटल रंगशाला

लुमेन फिल्ड साँच्चै सास रोक्ने रंगशाला हो। यो यति धेरै आवाजका लागि प्रसिद्ध छ कि दुईपटक गिनिज वर्ल्ड रेकर्ड्समा नाम दर्ता गरिसकेको छ। घोडाको नालजस्तो आकारको संरचनाले आवाजलाई रंगशालाभित्रै राख्छ। उत्तरतर्फको दर्शकदीर्घा जहाजको अग्रभागजस्तै देखिन्छ भने खुला आकाशसँगै सियाटलको मनमोहक दृश्य पनि देखिन्छ। भित्री मार्गहरू फराकिला छन् र त्यहाँ प्रदर्शन गरिएका कलाकार तथा सियाटल सिहक्स टोलीका ऐतिहासिक सामग्रीले रंगशालाको आफ्नै पहिचान झल्काउँछन्।