![एसिया कप : सम्झना खड्काको अर्धशतकमा नेपालको ऐतिहासिक जित](https://himalpress.com/wp-content/uploads/2024/07/Nepal-women.jpg)
काठमाडौँ- सम्झना खड्काको अर्धशतकमा नेपाली महिला राष्ट्रिय क्रिकेट टोली एसीसी महिला एसिया कपको पहिलो खेलमा ६ विकेटको जित दर्ता गरेको छ। खड्काले ३५ बलमा ८ चौकाको साथमा अर्धशतक पूरा गरिन्। ओपनरसमेत रहेकी उनले ४५ बलमा ११ चौका प्रहार गर्दै ७२ रनमा नटआउट रहिन्। यो उनको क्रिकेट करिअरको पहिलो अर्धशतक पनि हो। पुजा महतो ७ रनमा नटआउट रहिन् ।
नेपालका लागि सीता रानामगरले ७, कविता कुँवरले २ तथा इन्दु वर्माले ६, रुविना खड्काले १० रन जोडिन्। नेपालले टस जितेर यूएईलाई पहिलो ब्याटिङ गर्ने निम्तो दिएको थियो। यूएईले २० ओभरमा ८ विकेट गुमाएर ११५ रन जोड्यो।
यूएईका लागि खुसी शर्माले सर्वाधिक ३६ रन जोडिन्। कविशा एगोदागेले २२ रन, इशा ओजा १० रन, तिर्था सतिश, ९ र रिनिथा रजिथ ६ रनमा आउट भए।
नेपालका लागि कप्तान इन्दु वर्माले ४ ओभरमा १९ रन खर्चेर ३ विकेट लिइन्। कृतिका मरासिनी, सबनम राई र कविता जोशीले १-१ विकेट हात पारे। रुविना क्षेत्रीले ४ ओभरमा १८ रन र सिता रानामगरले ३ ओभरमा १२ रन मात्र खर्चिए। एसिया कपका यसअघिका आठ वटा खेलमा नेपाल जितबिहीन थियो। आजको जित नै पहिलो जित पनि हो।
नेपालले अब आइतबार पाकिस्तानसँग खेल्नेछ। मंगलबार नेपाल र भारत खेल्नेछन्। यो समूह चरणको अन्तिम खेल पनि हो।