हिमाल प्रेस 
काठमाडौँ- एसीसी पुरुष प्रिमियर कप-२०२६ अन्तर्गत समूह चरणको अन्तिम खेलमा नेपाल हङकङ चाइनासँग १५ रनले पराजित भएको छ।
मलेसियामा मंगलबार भएको खेलमा हङकङ चाइनाले दिएको २६२ रनको लक्ष्य पछ्याएको नेपाल ४९.१ ओभरमा १४६ रनमै अलआउट भयो। पराजित भए पनि नेपाल समूह ‘ए’ को विजेता बन्दै प्रतियोगिताको सेमिफाइनलमा पुगेको छ।
अब नेपालले बिहीबार हुने सेमिफाइनलमा समूह ‘बी’ को उपविजेता ओमानसँग प्रतिस्पर्धा गर्नेछ। सोही दिन हुने अर्को सेमिफाइनलमा हङकङ चाइनाले यूएईसँग खेल्नेछ।
टस जितेर पहिले ब्याटिङ गरेको हङकङ चाइनाले निर्धारित ५० ओभरमा सात विकेट गुमाउँदै २६१ रन बनाएको थियो। उसका लागि बाबर हयातले अविजित शतक प्रहार गरे। उनले १२६ बलमा ११७ रन बनाए।
हङकङका प्रारम्भिक ब्याटर जिसान अली १५ र अन्सुमान रथ १३ रनमा आउट भए पनि हयातले उत्कृष्ट ब्याटिङ गर्दै टोलीलाई बलियो योगफलतर्फ डोर्याए।
उनलाई शाहिद वासिफले ४९ बलमा ४५ रन तथा एहसान खानले अविजित ३५ रन बनाएर साथ दिए। अन्य ब्याटरले दोहोरो अंकको रन बनाउन सकेनन्।
नेपालका कप्तान सन्दीप लामिछानेले चार विकेट लिए भने शेर मल्लले तीन विकेट हात पारे।
२६२ रनको लक्ष्य पछ्याउने क्रममा नेपालले सुरुवातमै विकेट गुमाएको थियो। ओपनर मोहम्मद आसिफ शेखले ५० बलमा ४४ रन बनाए पनि अर्जुन कुमाल नवौँ ओभरमा १४ रनमा आउट भए। देव खनाल पनि १७औँ ओभरमा ६ रन बनाएर पेभेलियन फर्किए।
नेपालका लागि इशान पाण्डेले उत्कृष्ट संघर्ष गर्दै १०६ बलमा ९० रन बनाए। तर, उनलाई अर्को छेउबाट पर्याप्त साथ मिल्न सकेन।
रोहित पौडेल ३ रनमै आउट भए। दीपेन्द्रसिंह ऐरीले २५, गुल्सनकुमार झाले २० र करण केसीले २१ रन बनाए पनि उनीहरूले ठूलो स्कोर बनाउन सकेनन्।
हङकङका एजाज खानले चार विकेट लिए भने यासिम मुर्तजाले दुई विकेट लिए। अत्तेकुल इकबाल र नसरुल रानाले समान एक/एक विकेट लिए।
नेपाल समूह चरणमा उत्कृष्ट प्रदर्शन गर्दै सेमिफाइनल पुगेको हो। अब फाइनल प्रवेशका लागि बिहीबार ओमानविरुद्ध निर्णायक प्रतिस्पर्धा हुनेछ।
