पुतली अध्ययनमा जीवन बिताएका ‘पुतली बाजे’ भन्थे : पोखरेली भएर मर्न पाऊँ

कास्की- नेपालमा पुतलीको अध्ययनमा आफ्नो जीवन समर्पित गरेका कोलिन फिलिप स्मिथ ‘पुतली बाजे’को आज (सोमबार) अन्तिम बिदाइ गरिएको छ।

गत शनिबार बिहान ८७ वर्षको उमेरमा निधन भएका कोलिनको पोखरा महानगरपालिकाले श्रद्धाञ्जलीसहित बिदाइ गरेको हो। पुतली बाजेको पार्थिव शरीर पृथ्वीनारायण क्याम्पस परिसरमा रहेको ‘बटरफ्लाई म्युजियम’को प्राङ्गणमा राखिएका उनलाई अन्तिम श्रद्धासुमनका लागि उनका विद्यार्थी तथा सहपाठीको बाक्लो उपस्थिति थियो। कोलिनको पार्थिव शरीरमा पोखरा महानगरपालिकाका प्रमुख धनराज आचार्यले राष्ट्रिय झण्डा ओढाए।

बेलायतबाट सन् १९६६ मा ३० वर्षको उमेरमा नेपाल आएका उनको पूरै जीवन नेपालमा पुतलीको अध्ययन र अनुसन्धानमा व्यतित भएको थियो।

शिक्षा र प्रकृति संरक्षणमा नेपालमा गरेको योगदानस्वरुप सरकारले उनलाई सन् २०१९ मा सम्मानार्थ नागरिकता प्रदान गरेको थियो। कोलिनले नेपालका धेरै जिल्लामा पुगेर ६ सयभन्दा बढी प्रजातिका पुतली संकलन गरेका थिए।

कोलिनले नेपालमा पुतलीको अध्ययनसहित पोखरा, गोरखा र काठमाडौँमा शिक्षणसमेत गरे। महानगरप्रमुख आचार्यले पुतलीको माध्यमबाट नेपाललाई विश्वसामु चिनाउन उनको अतुलनीय योगदान रहेको स्मरण गरे। ‘नेपालको डाँडाकाँडा, भिरपाखा र पखेरा पुगेर ६ सयभन्दा बढी प्रजातिका पुतली संकलन गरेर ठूलो गुन लगाउनुभएको छ। मानव जीवन र पर्यावरणमा पुतलीको ठूलो भूमिका हुन्छ भनेर उहाँले उजागार गर्नुभयो,’ उनले भने।

आफ्नो व्यक्तिगत जिन्दगी र देशसमेत छाडेर नेपाल र पोखरालाई आफ्नो घर बनाएर पोखरेली भएर मर्न पाऊँ भन्ने उनको आकांक्षा अद्वितीय रहेको प्रमुख आचार्यको भनाइ छ। जीवनमा कोलिनले कसैलाई नपिराएको र सबैसँग अपनत्व रहेर बिदा भएको उनलाई बुझ्ने र जान्नेहरु बताउँछन्।

कोलिन गणितको शिक्षक भएर पनि प्रकृतिको संरक्षणमा लागेका थिए। उनकै अग्रसरतामा पृथ्वीनारायण क्याम्पस परिसरमा पुतली सङ्ग्रहालय स्थापना गरिएको छ। देश तथा विदेशबाट समेत सो सङ्ग्रहालयको अध्ययन अवलोकनका लागि प्रकृतिप्रेमीहरु आउने गरेका छन्। सङ्ग्रहालयमा कोलिनले संकलन गरेका पाँच सय ८७ प्रकारका पुतली राखिएको छ। पृथ्वीनारायण क्याम्पसँग समन्वय गरेर अन्नपूर्ण संरक्षण क्षेत्र आयोजना (एक्याप)ले सङ्ग्रहालय व्यवस्थापन गर्दै आएको छ।

अन्नपूर्ण संरक्षण क्षेत्र आयोजना प्रमुख डा. रविन कडरियाले साना पुतलीहरुको संरक्षण गर्नुपर्दछ भन्ने धारणाको विकासमा कोलिनले योगदान गरेको बताए। विदेशबाट आएर नेपालको पुतलीको अध्ययन र अनुसन्धानमा कोलिनको जीवन व्यतित भएको उनले स्मरण गरे।

पृथ्वीनारायण क्याम्पसका संस्थापक क्याम्पस प्रमुख जोर्ज जोनले नेपालमा नचिनेका र नजानेका मानिसका लागि कोलिनले जीवन समर्पित गरेको बताए।

कोलिन लामो समयदेखि पोखरा–१८ लामागाउँमा बस्दै आएका थिए। स्वास्थ्यमा समस्या देखिएपछि उनलाई पोखराको हरियोखर्क अस्पतालमा उपचार गरिएको थियो। कोलिनको श्रद्धाञ्जलीपछि क्रिश्चियन परम्पराअनुसार अन्तिम संस्कार गरिएको छ। रासस