प्रधानमन्त्रीद्वारा चीन र अमेरिका भ्रमणबारे संसद्लाई जानकारी

काठमाडौँ– प्रधानमन्त्री पुष्पकमल दाहाल ‘प्रचण्ड’ले आफ्नो आसन्न अमेरिका र चीन भ्रमणबारे प्रतिनिधिसभा बैठकमा जानकारी गराएका छन्। प्रतिनिधिसभाको शुक्रबारको बैठकमा सम्बोधन गर्दै प्रधानमन्त्री प्रचण्डले यस्तो जानकारी दिएका हुन्।

उनी भदौ ३० गते अमेरिका जानेछन्। भ्रमणका लागि सकेसम्म सानो र छरितो प्रतिनिधिमण्डल बनाइएको प्रधानमन्त्रीले बताए। संयुक्त राष्ट्रसंघको महासभामा उनले असोज ४ गते सम्बोधन गर्नेछन्। उनले महासभामा नेपालले प्राप्त गरेको राजनीतिक उपलब्धिबारे जानकारी गराउनेछन्। साथै विभिन्न देशका सरकार र राष्ट्रप्रमुखसँग साइडलाइड वार्ता गर्ने जानकारी प्रधानमन्त्रीले दिए।

असोज ५ गते अमेरिकाबाटै चीन भ्रमणमा जानेछन्। उनी न्युयोर्कबाट सीधै ग्वान्जाओ जाने कार्यक्रम तय भएको छ। उनले चीनका राष्ट्रपति सीन जिनफिङसँग भेट गर्ने कार्यक्रम रहेको जानकारी दिए। आफ्नो चीन भ्रमणले  दुई देशबीचको सम्बन्ध थप सुदृढ हुने उनले बताए। साथै उनले भ्रमणका क्रममा कोभिड–१९ पछि बन्द भएका परम्परागत नाका खुलाउने विषयमा वार्ता गर्ने जानकारी दिए।