सरकारले मिटरब्याज पीडितलाई न्याय दिएन, झुक्यायो : एमाले

काठमाडौँ- प्रमुख प्रतिपक्षी दल नेकपा (एमाले)का प्रमुख सचेतक पदम गिरीले सरकारले मिटरब्याज पीडितलाई न्याय नदिएर झुक्याउन खोजेको आरोप लगाएका छन्।

आइतबारको प्रतिनिधिसभा बैठकमा मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० माथिको सैद्धान्तिक छलफलमा बोल्दै उनले वैशाख २७ गतेदेखि असार ५ सम्म सरकार लामो निद्रामा परेको र हतारमा असार ११ गते राष्ट्रियसभाको ‘फुल हाउस’बाट हतार हतार छलफल नगरी विधेयक पारित गरेको बताए।

‘राष्ट्रियसभाले फास्ट ट्रयाकबाट पारित गरेको छ। यहाँ डकुमेन्ट हाम्रो हातमा छैन। तर पनि छलफलमा बस्नुपरेको छ,’ उनले भने, ‘संसद्लाई गुमराहमा राख्ने गरी विधेयक पास गर्न सरकारले खोजेको छ। जनता र सदनलाई गुमराहामा राख्ने काम सरकाले गरिरहेको छ, यो यो चेष्टा नगरोस्।’

उनले मिटरब्याज गम्भीर विषय भएको र ठूला नेता, प्रहरी, उच्च ओहदाका लगायत व्यक्तिको संलग्नता भएको बताए। उनले एकैदिन दुईपटक बैठक बसेर विधेयक टेबल गर्ने र छलफल गर्ने वातावरण बन्नु सरकारको चरम लापारवाही र गैरजिम्मेवारीका कारण भएको बताए।

‘ताजा जनादेश पाएको सात महिनामा पनि एउटा पनि ऐन, नियम बनाउन सकेको छैन। जनताले प्रश्न उठाएका छन्,’ उनले भने।