हिमाल प्रेस 
काठमाडौँ- संघीय संसद् सचिवालय चुनावबाट उदाएका नयाँ दलका लागि सिंहदरबारमा कार्यालयमा खोज्नमा केन्द्रित भएको छ। संसद् सचिवालयका प्रवक्ता रोजनाथ पाण्डेका अनुसार सिंहदरबारभित्र रहेका विभिन्न भवनहरू हेरिएको छ। उनका अनुसार हेलो सरकार बस्दै आएको भवन, रक्षा मन्त्रालयको फ्लोर, पूरानो गृहमन्त्रालय रहेको भवनलाई विकल्पमा रुपमा लिइएको छ।
संघीय संसद् सचिवालयले चुनावबाट उदाएका रवि लामिछाने नेतृत्वको राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा), सिके राउत नेतृत्वको जनमत पार्टी, रञ्जिता श्रेष्ठ नेतृत्वको नागरिक उन्मुक्ति पार्टी (नाउपा)का लागि कार्यालय खोजेको हो।
अघिल्लो संसद्मा राप्रपाको जम्मा एक सिट थियो राष्ट्रिय दल बनेको थिएन। संसदीय दलको कार्यालय उसले पाउँथेन। यसपटक प्रत्यक्षमै ७ सिट जितेको छ। समानुपातिकतर्फबाट समेत गर्दा यस पार्टीले थप ७ सांसद पाउन सक्छ। यसकारण यसपटक राप्रपालाई नयाँ संसदीय दलको कार्यालय नै उपलब्ध गराउनुपर्ने हुन्छ।
संसद् सचिवालयका अनुसार नेपाली कांग्रेस, नेकपा एमाले, नेकपा माओवादी केन्द्र, एकीकृत समाजवादी, जनता समाजवादी पार्टी (जसपा)सहितलाई पहिलेकै संसदीय दलको कार्यालय प्रयोग गर्न दिइनेछ। कुनै दलबाट एक जना सांसद मात्रै निर्वाचित भएको भए पनि एउटा कोठा दिने अभ्यास छ।
स्वतन्त्र सांसदले पनि माग गर्दा सिंहदरबारका कार्यालय पाउने अभ्यास छ। यस अनुसार जनमोर्चाकी दुर्गा पौडेल बस्दै आएको कोठा यसपटक र राजमोबाट निर्वाचित चित्र बहादुर केसीलाई प्रयोग गर्न दिने, नेमकिपाका प्रेम सुवाललाई पुरानै कोठा प्रयोग गर्न दिने तयारी छ।
यसपटक स्वतन्त्र रुपमा ७ जना निर्वाचित भएका छन्। उनीहरूले पनि माग गरेको खण्डमा कम्तिमा एउटा कोठा दिइने र यस्तो अभ्यास रहेको प्रवक्ता पाण्डे बताउँछन्। प्रवक्ता पाण्डेका अनुसार तीन वटा नयाँ दल र स्वतन्त्रहरू समेतलाई मध्यनजर गरेर हल सहितका १६ वटा कोठा आवश्यक रहेको जानकारीसहित मुख्य सचिवलाई पत्राचार गरिएको छ।
निर्वाचन आयोगले चुनावको अन्तिम नतिजा आएपछि कुन-कुन दल आए भनेर पठाउने भए पनि आइसकेपछि कार्यालयको समस्या नपरोस् भनेर सचिवालयले अग्रिम तयारी गरेको हो। प्रवक्ता पाण्डे भन्छन्, ‘चुनावको अन्तिम नतिजा नआए पनि कुन-कुन दल नयाँ आउँछन भन्ने आंकलन भएको छ। त्यसअनुसार कार्यालयका लागि भवन खोजिएको हो।’
