हिमाल प्रेस 
पोखरा- पृथ्वीराजमार्गअन्तर्गत डुम्रे-मुग्लिन सडक खण्डमा ट्रक पल्टिएर घरमा ठोक्किँदा ३ जनाको मृत्यु भएको छ। दुर्घटनामा ५ जना घाइते भएका छन्। डुम्रेबाट मुग्लिनतर्फ जाँदै गरेको ना४ख १९७३ नम्बरको ट्रक बुधबार बिहान करिब सवा ९ बजे अनियन्त्रित भई सडकको छेउमा रहेको सुनमाया भुजेल र सनबहादुर भुजेलको घरमा ठोक्किएको थियो।
दुर्घटनामा ८ जना घाइते भएकोमा ३ जनाको चितवनस्थित पुरानो मेडिकल कलेजमा उपचारक्रममा मृत्यु भएको जिल्ला प्रहरी कार्यालय तनहुँले जानकारी दिएको छ।
मृत्यु हुनेमा बन्दीपुर गाउँपालिका-१ का १२ वर्षीय आयुस भुजेल, ५० वर्षीय चेतबहादुर घर्ती र ६९ वर्षीय सनबहादुर भुजेल रहेका छन्। घाइते सबै बालबालिका रहेका प्रहरीले बताएको छ।
घाइते हुनेमा ६ वर्षीय आयुष भुजेल, १० वर्षीय जस्मिन भुजेल, १० वर्षीय ईश्वर भुजेल, ८ वर्षीय समीर भुजेल र ५ वर्षीय सन्तोष भुजेल रहेका छन्। घटनाको अनुसन्धान भइरहेको तनहुँ प्रहरीले बताएको छ।
