हिमाल प्रेस 
काठमाडौँ– नेपाल आयल निगमले बजारमा खाना पकाउने एलपी ग्याँस नपाएको खण्डमा तत्काल निगमको हटलाइन नम्बरमा सम्पर्क गर्न उपभोक्ताहरूसँग आग्रह गरेको छ । बजारमा ग्याँसको अभाव रहेको भन्दै गुनासो आउन थालेपछि निगमले विज्ञप्ति जारी गर्दै कार्यालय समयभित्र हटलाइन नम्बर ०१–५९७१९०२ मा सम्पर्क गरी जानकारी दिन अनुरोध गरेको हो ।
निगमले बजारमा एलपी ग्याँसको आयात र बिक्री वितरण नियमित भइरहेको स्पष्ट पारेको छ । तर, उपभोक्ताले सहज रूपमा ग्याँस नपाएको अवस्थामा निगमको हटलाइनमा खबर गरेर सहजीकरण गर्न सकिने जनाइएको छ ।
यसैबिच, काठमाडौँ उपत्यकामा ग्याँसको माग र आपूर्तिलाई थप सहज बनाउन निगमले आफ्नो टेकुस्थित कार्यालयबाट समेत बिहान ११ः ०० देखि बेलुका ५ः ०० बजेसम्म उद्योगहरू मार्फत सोझै ग्याँस बिक्री वितरणको व्यवस्था मिलाएको छ ।
टेकु कार्यालयबाट नेपाल ग्याँस, एचपी ग्याँस, एभरेस्ट ग्याँस, सुगम ग्याँस र श्रीराम ग्याँस बिक्री वितरण हुनेछ । साथै निगमले आम उपभोक्तालाई अनावश्यक भण्डारण नगर्न र आवश्यकता अनुसार मात्र ग्याँस खरिद गर्नसमेत पुनः आग्रह गरेको छ ।
