चितवनका स्थानीय वजारमा पनि पाइन्छ याक चिज

काठमाडौँ- चितवनका स्थानीय वजारमा पनि याक चिज उपलब्ध हुन थालेको छ। चितवन जिल्ला दुग्ध उत्पादक सहकारी संघले आफ्ना डेरीमार्टहरूमा याक चिज उपलब्ध गराउन थालेको हो। संघका अध्यक्ष किशोर बगालेले संघले आइतबारदेखि याक चिज जिल्लामा उपलब्ध गराउन थालेको जानकारी दिए। दुग्ध विकास संस्थान (डीडीसी)ले उत्पादन र बिक्री वितरण गर्दै आएको सो चिज जिल्लामा ल्याइएको हो।

संस्थानले उत्पादन गरेका अन्य वस्तुहरुसमेत मार्टबाट बिक्री गर्ने तयारी गरिएको उनले बताए। उनले भने, ‘याकको चिज अहिले परीक्षणस्वरुप बिक्रीका लागि ल्याएका छौँ। ग्राहकको मागअनुसार यसको आयात बढाइने छ।’ स्थानीय उत्पादनलाई प्राथमिकता दिनका लागि याकको चिजलाई आफूहरुले बिक्री गर्न थालेको उनले बताए।

संघले सञ्चालन गरेको मार्टमा आफ्नै उत्पादनका दुग्ध जन्य वस्तुहरुको उपलब्ध हुँदै आएको छ। दूध, दही, पनिर, चिज, मोही, नौनी, घ्यूजस्ता वस्तु उपलब्ध हुँदै आएको छ। संघले आफ्नो उत्पादनलाई बजारीकरण गर्नका लागि दुग्धजन्य वस्तुको उत्पादन गर्दै आएको हो। संघले रत्ननगरमा रहेको आफ्नै उद्योगमा उत्पादित बिक्री वितरण गर्दै आएको छ। रासस