रास्वपा पनि गठबन्धनकै बाटोमा, सिरहमा प्रलोपासँग मिल्यो

काठमाडौँ- सिरहामा राष्ट्रिय स्वतन्त्र पार्टी (रास्वपा) र जनार्दन शर्मा संरक्षक रहेको प्रगतिशील लोकतान्त्रिक पार्टी (प्रलोपा) बीच चुनावी सहकार्य गर्ने सहमति भएको छ ।शुक्रबार सिरहा क्षेत्र नम्बर–२ मा दुई पार्टीबीच चुनावी सहकार्य गर्ने सहमति भएको हो ।

प्रलोपाका केन्द्रीय सदस्य एवं सिरहा जिल्ला इन्चार्ज अरविन्द यादवले सिरहा–२ मा रास्वपाका उम्मेदवारलाई समर्थन गर्ने गरी चुनावी सहकार्य भएको बताए । यहाँ रास्वपाका शिव यादव प्रतिनिधि सभा उम्मेदवार बनेका छन् ।

जनताको हित सुशासन,लोकतान्त्रिक मूल्यमान्यता र परिवर्तनमुखी राजनीतिक अभ्यासलाई मजबुत बनाउन रास्वपालाई समर्थन गरिएको प्रलोपाका नेता यादवले बताए ।

रास्वपाका शिव यादव र प्रलोपाका अरविन्द यादवले सहमतिपत्रमा हस्ताक्षर गरेका छन् । आगामी फागुन २१ गते प्रतिनिधि सभा निर्वाचन हुँदैछ ।