हिमाल प्रेस 
काठमाडौँ – मधेश प्रदेशका मुख्यमन्त्रीमा नेपाली कांग्रेस संसदीय दलका नेता कृष्णप्रसाद यादव नियुक्त भएका छन्।
प्रदेश प्रमुख सुरेन्द्र लाभले कांग्रेस संसदीय दलका नेता यादवलाई संविधानको धारा १६८ (२) बमोजिम मुख्यमन्त्री नियुक्त गरेका हुन्।
यसअघि ६ दलका ७७ प्रदेश सांसदको समर्थनमा यादवले आफूलाई मुख्यमन्त्री नियुक्त गर्न प्रदेश प्रमुख लाभसमक्ष दाबी पेस गरेका थिए।
उनलाई मुख्यमन्त्री नियुक्त गर्न कांग्रेससहित जसपा नेपाल, जनमत पार्टी, माओवादी केन्द्र, लोसपा र एकीकृत समाजवादीका ७७ प्रदेश सांसदले समर्थन गरेका छन्।
शुक्रबार बसेको ६ दलको बैठकमा कांग्रेस संसदीय दलका नेता यादवलाई मुख्यमन्त्री बनाउने सहमति जुटेको थियो। यसअघि मुख्यमन्त्रीका लागि लोसपाले समेत दाबी गरे पनि कांग्रेसको नाममा सहमति जुटेको थियो।
यसअघिका मुख्यमन्त्री सरोजकुमार यादवले राजीनामा दिएपछि मधेशमा नयाँ सरकार गठनको प्रक्रिया अगाडि बढेको हो। उनलाई तत्कालीन प्रदेश प्रमुख सुमित्रा सुवेदी भण्डारीले संविधानको धारा १६८ (३) बमोजिम मुख्यमन्त्री नियुक्त गरेकी थिइन्। एमाले संसदीय दलका नेता यादवलाई सर्वोच्च अदालतले २४ घन्टाभित्र विश्वासको मत लिन परमादेश जारी गरेको थियो।
विश्वासको मत प्राप्त गर्न नसकेपछि संविधानको धारा १६८ (२) बमोजिम सरकार गठन प्रक्रिया अगाडि बढाउन सर्वोच्चले परमादेश दिएको थियो। सर्वोच्चको यही परमादेशबमोजिम मधेश प्रदेशमा फेरि नयाँ सरकार गठन भएको हो।
