सयपत्री फूलखेतीबाट वार्षिक सात लाख बचत गर्दै लालबाबु

महोत्तरी- जिल्लाको मनराशिस्वा नगरपालिका–३ सोनौल गाउँका लालबाबु भण्डारीले सयपत्री फूलखेतीबाट वार्षिक सात लाख बचत गरिरहेका छन्। करिब २० कट्ठा क्षत्रमा लगाइएको सयपत्री फूलखेतीबाट उनले वार्षिक सात लाख बचत गर्दै आएका छन्।

अहिले लालबाबुको दैनिकी बिहान ५ः०० बजेदेखि बेलुकाका ५ः०० बजेसम्म फूलखेतीमा बित्ने गरेको छ। गाउँको दुई स्थानमा १०-१० कट्ठामा क्षेत्रफलमा सयपत्री फूलखेती गरेका लालबाबुले दिनभरि फूलको बिरूवा हेरचाह, सिँचाइ, मलखाद्य र फूल टिप्ने कार्यमा बिताउँछन्।

फूलखेतीमा उनलाई छोराद्वय विकास र आकाशले पनि सघाउने गरेका छन्। भारतको मुज्जफरपुरबाट सयपत्री फूलको बिरूवा प्रतिवटा भारु दुईमा ल्याएर रोपाइँ गर्ने गरेको लालबाबुले बताए। उनका अनुसार एउटा बिरुवा हुर्कन २० देखि ४० दिन लाग्दछ। ‘एउटा बिरुवा सप्रिएपछि तीन–चार महिनासम्म फूल दिने गर्दछ। दश कट्ठामा लगाइएको एक हजार २०० बिरुवाले एकैपटक फूल दिँदा एक दिनमा ५० किलोसम्म हुन्छ,’ उनले भने।

उनले दुई स्थानमा फरकफरक समयमा फल्ने सयपत्री लगाएका छन्। एक स्थानमा उत्पादित फूल सकिन लाग्दा अर्को स्थानमा फूल्न थाल्ने भएकाले वर्षभरि बिक्री गर्न सक्ने लालबाबुले बताए। सयपत्री फूलको माग वर्षभरि हुने भएकाले सधैं आपूर्ति गर्न सफल भएको उनको भनाइ छ।

‘एउटा सयपत्री फूल उनेको मालाको रु ५० देखि रु ७० पर्छ। घरमा आएका व्यापारीलाई ४० मा बिक्री गर्छौं। यसबाट दैनिक पाँच हजारसम्म आम्दानी हुने गरेको छ,’ लालबाबुका छोरा विकासले भने। थोकमा प्रतिकिलो चारदेखि ५०० सम्ममा बिक्री गर्दा दैनिक दुई हजारदेखि पाँच हजारसम्म आम्दानी हुने उनले जानकारी दिए।

लालबाबुले घरमा ‘जयमा फूल भण्डार’ नाममा पसल सञ्चालन गर्नुभएको छ। वर्षभरिको घरखर्च, छोराहरूको पढाइ र अन्य खर्च कटाएर सात लाखसम्म बचत हुने गरेको उनले जानकारी दिए। रासस