हिमाल प्रेस 
फाइल तस्बिरः एपी।
काठमाडौँ- रूसका राष्ट्रपति भ्लादिमिर पुटिन भारत भ्रमणमा आउने भएका छन्। उनी आगामी ४ डिसेम्बरमा भारत भ्रमणमा आउन लागेका हुन्। उनी ५ डिसेम्बरसम्म भारतमा रहनेछन्।
भारतको विदेश मन्त्रालयले रूसी राष्ट्रपति पुटिन दुई दिने भ्रमणमा भारत आउन लागेको जनाएको छ।
‘प्रधानमत्री नरेन्द्र मोदीको निमन्त्रणामा रूसका राष्ट्रपति भ्लादिमिर पुटिन ४–५ डिसेम्बर २०२५ मा भारतको भ्रमणमा आउनेछन्। राष्ट्रपति पुटिन भारत–रूसको २३ औँ वार्षिक शिखर बैठकमा सहभागी हुनेछन्,’ विदेश मन्त्रालयको विज्ञप्तिमा भनिएको छ।
भ्रमणका क्रममा राष्ट्रपति पुटिनले भारतीय प्रधानमन्त्री मोदीसँग वार्ता गर्नेछन्। साथै राष्ट्रपति द्रौपदी मुर्मुसँग पनि उनको भेट हुनेछ।
यो भ्रमण भारत र रूसबीचका द्विपक्षीय सम्बन्धहरूको समीक्षा गर्ने तथा रणनीतिक साझेदारीलाई अझ सबल बनाउने महत्वपूर्ण अवसर हुने विदेश मन्त्रालयले जनाएको छ।
दुवै नेताहरूबीच वैश्विक मुद्दामा समेत छलफल हुने जनाइएको छ।
राष्ट्रपति पुटिनको अन्तिम भारत भ्रमण डिसेम्बर २०२१ मा भएको थियो। फेब्रुअरी २०२२ मा युक्रेनसँग युद्ध सुरू भएपटि पुटिन भारत आएका छैनन्।
यहाँसम्म कि सेप्टेम्बर २०२३ मा नयाँ दिल्लीमा आयोजना गरिएको जी–२० शिखर सम्मेलनमा पनि पुटिन आएका थिएनन्।
