हिमाल प्रेस 
फाइल तस्बिर।
काठमाडौँ– बंगलादेशका पूर्वप्रहरी प्रमुखले गत वर्ष प्रदर्शनकारीहरूमाथि गरिएको दमनका क्रममा मानवता विरुद्धको अपराधमा दोष स्वीकार गरेको र पूर्वप्रधानमन्त्री शेख हसिनालाई औपचारिक रूपमा अभियोग लगाइएको बिहीबार पुनः सुरु भएको मुद्दामा अभियोजकहरूले बताएका छन्।
संयुक्त राष्ट्रसंघका अनुसार हसिनाको सरकारले विद्यार्थी नेतृत्वको विद्रोहलाई दमन गर्ने प्रयास गर्दा सन् २०२४ जुलाई र अगस्तका बीचमा एक हजार चार सय मानिस मारिएका थिए।
बंगलादेशको अन्तर्राष्ट्रिय अपराध न्यायाधिकरण (आईसीटी) ले हसिनाको अपदस्थ सरकार र उनको अहिले प्रतिबन्धित पार्टी अवामी लिगसँग सम्बन्धित पूर्ववरिष्ठ व्यक्तिहरूलाई मुद्दा चलाइरहेको छ।
‘पूर्व प्रहरी महानिरीक्षक (आईजीपी) चौधरी अब्दुल्लाह मामुनले मानवता विरुद्धको अपराधमा दोष स्वीकार गर्नु भएको छ,’ आईसीटीका प्रमुख अभियोजक मुहम्मद ताजुल इस्लामले पत्रकारहरूलाई भने।
‘जुलाई–अगस्ट विद्रोहको समयमा भएका अपराधहरूबारे आफूसँग भएका सबै जानकारी’ दिँदै मामुनले साक्षीका रूपमा काम गरेर अदालतलाई सहयोग गर्न सहमत भएको इस्लामले बताए।
अदालतले मामुनको सुरक्षा सुनिश्चित गर्न छुट्टै आवासको व्यवस्था गर्न अनुमोदन गरेको छ।
न्यायाधिकरणले बिहीबार हसिना र उनका गृहमन्त्री असादुज्जमान खान कमालमाथिका आरोपहरू खारेज गर्न वकिलहरूको अनुरोध पनि अस्वीकार गरेको छ।
हसिना र कमाललाई सोही मुद्दामा औपचारिक रूपमा अभियोग लगाइएको छ।
हसिना र कमालका राज्यद्वारा नियुक्त वकिल आमिर हुसेन भने आशावादी छन्। ‘मुद्दा प्रारम्भिक चरणमा छ र अन्य धेरै चरण छन्,’ उनले भने।
विरोध प्रदर्शनले आफ्नो १५ वर्षको शासन समाप्त गरेपछि ७७ वर्षीया हसिना हेलिकप्टरबाट भारत भागेकी थिइन्। उनले ढाका फर्कने प्रत्यर्पण आदेशको अवहेलना गरेकी छन्। ढाकामा उनको अनुपस्थितिमा जुन १ मा मुद्दा सुरु भएको थियो।
हसिनाले आईसीटीमा कम्तीमा पाँचवटा आरोपको सामना गरिरहेकी छन्। यसमा ‘जुलाई विद्रोहको समयमा सामूहिक हत्याका लागि उक्साउने, प्रेरणा गर्ने, संलग्नता, सहजीकरण, षड्यन्त्र र रोकथाम गर्न असफल हुने’ समावेश छन्।
अभियोजकहरूले हिंसाका लागि हसिनाले समग्र कमान्डको जिम्मेवारी लिएको बताएका छन्।
उनलाई जुलाई २ मा छुट्टै मुद्दामा अदालतको अवहेलनाको दोषमा दोषी ठहराइएको थियो, जसमा ६ महिनाको सजाय भएको थियो।
फरार पूर्वमन्त्री कमाल पनि भारतमा रहेको विश्वास गरिन्छ।-रासस/एएफपी
