हिमाल प्रेस 
प्रतिनिधिसभाका सभामुख देवराज घिमिरे बुधबार सिंहदरबारस्थित प्रमुख दलका मुख्य सचेतक तथा प्रमुख सचेतकसँग अध्यादेश लगायतका विषयमा छलफल गर्नुभएको छ । तस्बिरः गोपाल दाहाल/रासस
काठमाडौँ- सरकारले संसद्मा प्रस्तुत ६ वटै अध्यादेश संघीय संसद् (प्रतिनिधिसभा र राष्ट्रियसभा) को बिहीबार बस्ने बैठकबाट पारित गर्ने विश्वास लिएको छ।
प्रतिनिधिसभाका सभामुख देवराज घिमिरे उपस्थितिमा प्रतिनिसभामा प्रतिनिधित्व गर्ने प्रमुख दलका मुख्य सचेत र प्रमुख सचेतकको आज (बुधबार)को बैठकले संसद्मा प्रवेश पाएका अध्यादेशमाथि दुवै सदनमा छलफल गरी पारित गर्ने सहमति गरेको हो।
कानुन, न्याय तथा संसदीय मामिलामन्त्री अजयकुमार चौरसियाले सदन दुवै सदनको बिहीबार बस्ने बैठकमा अध्यादेश प्रस्तुत गर्ने, विरोधको सूचना दर्ता गराउनले मन्तव्य राख्ने, त्यसमा सम्बन्धित मन्त्रीले जवाफ दिने र समूहगत रूपमा निर्णयार्थ प्रस्तुत गरिने कार्यसूचीबारे तय भएको जानकारी दिए।
अधिवेशनको पहिलो दिन यही माघ १८ गते सहकारीसम्बन्धी केही नेपाल ऐनलाई संशोधन गर्ने अध्यादेश–२०८१, सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश–२०८१, आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश–२०८१, निजीकरण (पहिलो संशोधन) अध्यादेश–२०८१, आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने अध्यादेश–२०८१ र भूमिसम्बन्धी केही नेपाल ऐनलाई संशोधन गर्ने अध्यादेश–२०८१ बैठकमा पेस गरेको थियो।
नेकपा (एमाले)का मुख्य सचेतक महेशकुमार बर्ताैलाले अध्यादेश पारित हुने गरी बिहीबारको सदनको कार्यसूची र प्रक्रिया अघि बढ्ने बताए। ‘सत्तापक्षमा रहेका सबै राजनीतिक दल सरकारले लिने निर्णय, कार्यक्रम र जारी भएका अध्यादेशकाबारे पक्षमा उभिने कुरामा सरकार पक्षमा रहेका राजनीतिक दलबीच कुनै बेमेल छैन, सबै दलहरू एक ठाउँमा छौँ, हामी प्रतिनिधिसभामा पनि बलियो बहुमत छ। राष्ट्रियसभामा पनि कुनै समस्या छैन अध्यादेश पारित गर्छाैं,’ उनले भने।
यसपटक मात्र नभई नेपालको लोकतान्त्रिक अभ्यासमा यसअघि धेरै अध्यादेश जारी भएका घटना सुनाउँदै प्रमुख सचेतक बर्ताैलाले अहिलेको अध्यादेश देश र जनताका हितलाई ध्यान दिँदै निजी क्षेत्रलाई आशा जगाउने र अर्थतन्त्रलाई चलायमान बनाउन ल्याइएकाले स्वागत गरेर जान आग्रह गरिएको बताए।
प्रतिनिधिसभामा प्रमुखप्रतिपक्ष दल नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले प्रतिनिधिसभाको बिहीबारको बैठकलाई सम्बोधन गर्नेछन्। सरकारका तर्फबाट स्वास्थ्य तथा जनसङ्ख्यामन्त्री प्रदीप पौडेलले केही धारणा राख्नेछन्। भ्रष्टाचार र सुरक्षित कारोबारसँग सम्बन्धित प्रतिवेदन पनि सदनमा टेबुल गरिनेछ।
नेपाली कांग्रेसका प्रमुख सचेतक श्यामकुमार घिमिरेले अध्यादेशका बारेमा ५१ वटा विरोधका सूचना प्राप्त भएकाले नियमावलीअनुसार छलफल गरी समूहगत रूपमा निर्णयार्थ प्रस्तुत गरिने सहमति भएको बताए। ‘एउटा प्रस्तावमा एउटा प्रस्तावक हुने, छलफलमा अस्वीकारको सूचना दिने सबैले बोल्ने, मन्त्रीले जवाफ दिने र एउटा अध्यादेशलाई एक पटकमात्र समूहगत रूपमा निर्णयार्थ प्रस्तुत हुनेछ,’ उनले भने।
हिउँदे अधिवशेनको पहिलो बैठकमा राष्ट्रिय स्वतन्त्र पार्टीका तर्फबाट भएका गतिविधि आगामी बैठकमा हुन नदिनेतर्फ ध्यान पुर्याउन पार्टी सचेतकलाई आग्रह गरिएको थियो।
रास्वपाका सचेतक सन्तोष परियारले सरकारले सदनमा टेबुल गरेको ६ वटा अध्यादेश धेरै नै अस्वीकारको प्रस्ताव परेकाले कसरी व्यवस्थापन गर्ने भन्ने सन्दर्भमा नियमावलीको व्यवस्थाअनुरूप राजनीतिक पार्टीबीच सहमति कायम गरी टुङ्ग्याउने सहमति भएको जानकारी दिए। उनले भने, ‘भोलिको कार्यसूची धेरै र लामो भएकाले कसरी समय व्यवस्थापन गर्ने भनी विभिन्न कोणबाट छलफल भएको छ। शून्य समय र विशेष समय रहने, प्रमुख प्रतिपक्ष दलका नेताको मन्तव्यपछि मुख्य गरी अध्यादेशमा केन्द्रित हुने र निर्णयार्थ प्रस्तुत हुनेछ,’ उनले भने।
