अस्ताउँदो सूर्यलाई अर्घ्य दिँदै श्रद्धालु [तस्बिरहरू]

काठमाडौँ- छठ पर्वको तेस्रो दिन बिहीबार अस्ताउँदै गरेको सूर्यलाई अर्घ्य दिइएको छ। तराईमधेशसहित देशभरका पोखरी, नदी, तलाउ, जलाशयहरूमा भेला भएका ब्रतालुले सूर्यलाई अर्घ्य दिएका छन्। बुधबार साँझ खरना सकिएसँगै ब्रतालुले पोखरीका घाटहरूमा पूजाका सामग्री पुर्‍याइसकेका थिए।

राष्ट्रपति रामचन्द्र पौडेलले काठमाडौँको कमलपोखरीमा पुगेर अस्ताउँदो सूर्यलाई अर्घ्य दिएका छन्।

अस्ताउँदै गरेको सूर्यलाई अर्घ्य दिइसकेपछि पूजन समाग्रीहरु घाटमै राखेर ब्रतालुहरू रातभर जाग्राम बस्ने गर्दछन्। शुक्रबार बिहान ब्रतालुहरूले उदाउँदै गरेको सूर्यालाई अर्घ्य दिएपछि छठ पर्व सम्पन्न हुनेछ। छठको अन्तिम दिनलाई पारन भनिन्छ। सूर्योदय हुनुपूर्व परिवारका सदस्यहरू फेरि जलाशयमा पुगेर श्रद्धा र भक्ति भावका साथ पूजा गर्ने गर्दछन्।

देशभर प्रसिद्ध जनकपुरको छठ हेर्न ठूलो संख्यामा आन्तरिक तथा बाह्य पर्यटकहरू पुगेका छन्।