हिमाल प्रेस 
सप्तरी- केही दिनअघिको अविरल वर्षाका कारण जीता खोलाको आएको बाढीले राजविराज-कुनौली सडकखण्डमा रहेका पुल भासिदा आवतजावतमा समस्या भएको छ।
साथै भारतसंग जिल्लालाई जोड्ने प्रमुख सो सडक वर्षाले पूर्ण रूपमा अवरुद्ध भएको छ। यसबाट तिलाठी कोइलाडी गाउँपालिका-१ तिलाठीस्थित राजविराज भन्सार कार्यालयको राजश्व संकलनमा प्रभावित समेत भएको छ। अहिले सो सडक र भासिएको पुलबाट पानी बगिरहेको छ।
वर्षा हुुनासाथ जीर्ण रहेका पुलबाट आवतजावत गर्न र सडक कटानको समस्या दोहोरिने जनाइएको छ। साथै कटानसमेत हुने गरेको छ।
स्थानीयवासी विन्देश्वरी यादवले जीता खोलामा आएको बाढीले पुल बगाउँदा तिलाठीस्थित राजविराज भन्सारसम्म आवतजावत गर्न समस्या भएको बताए। उनले भनिन्, ‘वर्षाका कारण वस्ती डुबानमा नै रहेको अवस्था छ। राजविराज-कुनौली सडकखण्डमा सवारीसाधनको आवतजावत पूर्ण रूपमा अवरूद्ध छ।’
सो सडकखण्ड अवरुद्ध हुँदा मल्हनियाँ जानका लागि १० किलोमिटर घुमेर जानुपर्ने बाध्यता रहेको र कुनोली बजारमा पुग्न एक घण्टा लाग्ने गरेको उनले बताए। वर्षायाम सुरु भएसँगै यो सडकखण्डमा पैदल आवतजावत गर्न पनि अप्ठ्यारो हुने गरेको स्थानीयवासी बिन्दुलाल मुखियाले बताए।
भारतबाट कुनौली हुँदै आएका मालवाहक सवारी भन्सार कार्यालय पुग्ने मुख्य बाटो यही हो। सडक अवरुद्ध हुँदा सरकारले उठाउने राजस्वमा त असर पर्छ नै स्थानीयलाई समेत जोखिम थपिएको छ। दुई वर्षअघि आएको बाढीले सडक भासिदा दुई जना बेपत्ता भएका थिए। कटानका कारण गाउँका बासिन्दालाई सदरमुकाम राजविराज पुग्न पनि कठिनाइ खेप्नुपर्ने बाध्यता रहेको स्थानीय बताउँछन्।
तिलाठी कोइलाडी गाउँपालिका-१ का वडाध्यक्ष दिनेश्वर मिश्र सडक कटानको समस्या तीन दशकभन्दा बढी समयदेखि रहेको बताउँछन्। उनले खाँडो र जीता नदीको बहाव सही तरिकाले व्यवस्थापन नहुँदा निरन्तर यो समस्याले यात्रीलाई सास्ती दिँदै आएको जानकारी दिए।
यद्यपि सरकारले गम्भीरता नदेखाएपछि यहाँका स्थानीय बासिन्दालाई वर्षायाममा यस्ता समस्या भोग्नुपर्ने नियति नै बनेको छ। ‘यो समस्या हरेकपटक वर्षायाममा आउँछ तर राज्यले गम्भीरता देखाउँदैन’, उनले भने, ‘यसले राजविराज भन्सार कार्यालयको राजस्व संकलनमा पनि निकै गिरावट आउँछ, यो समस्या जति चाँडो समाधान हुन्छ, स्थानीयसँगै राज्यका लागि त्यति नै फलदायी हुन्छ।’
तिलाठीस्थित राजविराज भन्सार कार्यालयका सूचना अधिकारी अजयप्रकाश भगतले राजविराज जोडिने कुनौलीको पूर्वी भेगसम्मको बीच बाटोमा रहेको पुल र सडक जीता खोलाले बगाएर क्षति गर्दा राजस्व संकलनमा धेरै गिरावट आएको बताए। उनले राजविराज भन्सारसम्म सवारीसाधन आउन नसकेका कारण आर्थिक वर्ष २०८१÷८२ को साउन र भदौमा लक्ष्यभन्दा कम राजस्व संकलन भएको बताए।
कार्यालयसम्म आउने बाटो जीर्ण र समयसमयमा बाढीले सडकमा क्षति गरेको सडक पुनःनिर्माण नभएका कारण राजस्व संकलन प्रभावित भएको सूचना अधिकारी भगत बताउँछन्।
उनले भने, ‘साउनमा ६७ लाख २३ हजार संकलन गर्ने लक्ष्य रहेकामा २३ लाख ८८ हजार संकलन भएको र भदौमा ६३ लाख ५५ हजार लक्ष्य रहेकामा १९ लाख ३८ हजार राजस्व असुली भयो।’
कुनोली बजार आवतजावतका लागि पुल नभएका कारण पनि राजस्व संकलनमा कमी आएको उनले बताए। यस्तै राजविराज भन्सारदेखि पूर्वतर्फको पुलसमेत बाढीले बगाउँदा नेपाली दैनिक उपभोग्य सामानमा किन्न निर्भर रहने कुनोली बजार जानसमेत समस्या छ। राजविराजदेखि १० किलोमिटर दक्षिणपूर्वमा भारतीय सिमानामा रहेको कुनोली बजारमा दैनिक उपभोग्य सामान किन्नेहरूको भीड लाग्ने गर्दछ।
दसैँतिहारका बेला बजार जाने नेपाली तिलाठीबाट दक्षिण खोला तरेर कुनोली बजार जाने बाटोमा समेत पुल नभएकाले सास्ती खेपिरहेको हनमाुननगर कंकालनी नगरपालिका-१४ का वासुदेव मण्डलले बताए। कुनोली बजारमा दैनिक उपभोग्य सामान किन्नका लागि जिल्लाको राजविराज, हनुमाननगर, भारदह, कञ्चनपुर, रुपनी, डिवन र तिलाठी कोइलाडी गाउँपालिकाको लौनिया, सकरपुरा, रम्पुरा, मल्हनिया र तिलाठीका सर्वसाधारण जाने गर्दछन्।
