हिमाल प्रेस 
म्याग्दी- म्याग्दीको अन्नपूर्ण गाउँपालिका-५ पाउद्वारका बासिन्दाले धार्मिकस्थल खयरभारानी तालमा संकलन भएको भेटी र गाउँमा नाचगानबाट जुटाएको आठ लाख ५० हजारभन्दा बढी रकम सामाजिक काममा परिचालन गरेका छन्।
समुन्द्री सतहदेखि चार हजार छ सय मिटर उचाइमा रहेको खयरभारानी तालमा जनैपूर्णिमा पर्वको मेला भर्न गएका भक्तजनले चढाएको भेटी र पाउद्वार गाउँमा आयोजना गरिएको सांस्कृतिक कार्यक्रममा संकलन भएको सो रकम विभिन्न संघ संस्थालाई सहयोग गरिएका जनाइएको छ।
पाउद्वार टोल विकास संस्थाका अध्यक्ष हरिप्रसाद तिलिजाले खयरमा संकलन भएको चार लाख ४९ हजार छ सय ४५ भेटी, गाउँमा भएको सांस्कृतिक कार्यक्रममा संकलन भएको दुई लाख ६८ हजार आठ सय ८५ र दाताहरुले गरेको एक लाख ३५ हजार विकास निर्माण, संस्कृति संरक्षण, खेलकुद र स्वास्थ्य क्षेत्रमा परिचालन गरिएको बताए।
‘गाउँभेलाको निर्णयअनुसार सांस्कृतिक कार्यक्रमको पुरस्कार, खयरभारानीको पुजा व्यवस्थापनलगायत शीर्षकमा तीन लाख १७ हजार नौ सय ५५ खर्च भएको थियो’, उनले भने, ‘खर्च कटाएर बेचेको पाँच लाख ३४ हजार पाँच सय ७५ विभिन्न संघसंस्था र योजनाका लागि उपलब्ध गराएका हौँ।’
पाउद्वारको कोतलेखोरेदेखि चिमीका जोड्ने सडक निर्माणका लागि दुई लाख ५० हजार, पाउद्वार माविलाई ७० हजार, पाउद्वार आमा समूहलाई ४५ हजार, भलिबल खेल कोषमा ३० हजार, टोलविकास समितिलाई २९ हजार पाँच सय ७५, पुर्ख्यौली नृत्य समूहलाई ३० हजार, खयरभारानी युवा क्लवलाई २५ हजार, गिबाङ टोललाई २५ हजार, पाउद्वार ढल निकासका लागि २५ हजार र पाउद्वार स्वास्थ्य इकाइका लागि रु १० हजार सहयोग गरिएको तिलिजाले जानकारी दिए।
खयरभारानीमा यही भदौ ३ गते लागेको जनैपूर्णिमा मेलामा दुई सय ३८ वटा भेडाको पाठा र साढीको बलि चढाएका थिए । खयरभारानीमा मागेको वर पूरा भएपछि भेडाको पाठा र साढ बलि चढाउने चलन छ।अन्नपूर्ण हिमशृंखलामा पर्ने बराह शिखर हिमालको फेदमा रहेको खयरभारानीमा जनैपूर्णिमाका दिन पूजाआजा र भाकल गरेमा मनोकांक्षा पूरा हुने जनविश्वास छ।
प्राकृतिक हिसाबले सुन्दर र रमणीय खयरभारानी ताल, त्यहाँबाट देखिने हिमाल, भेडा र चौँरीगाईको गोठ र पहाडी भूगोलको दृष्यले पर्यटकलाई लोभ्याएको छ।
