हिमाल प्रेस 
काठमाडौँमा शुक्रबार नेपाली कांग्रेसका ६ वटा महानगर समितिका सभापतिहरूसँगको छलफलमा नेता डा. शेखर कोइराला। तस्बिर स्रोत : कोइरालाको सचिवालय
काठमाडाैँ- नेपाली कांग्रेसका केन्द्रीय सदस्य डा.शेखर कोइरालाले ताेकिएकै समयमा १५औँ महाधिवेशन नभए पार्टी धराशयी हुने र निर्वाचनमा असर पर्ने बताएका छन्। काठमाडाैँमा शुक्रबार कांग्रेस महानगर समितिका सभापतिहरूसँगकाे छलफलमा डा. काेइरालाले यस्तो अभिव्यक्ति दिएका हुन्।
कोइरालाले भेटघाटमा पार्टी नेतृत्व र पदाधिकारीको कार्यशैली हेर्दा तोकिएको समयमा १५औँ महाधिवेशन हुनेमा शंका उत्पन्न भएको बताए। तोकिएको समयमा महाधिवेशन नभए पार्टी धराशयी हुने र त्यसको असर आगामी निर्वाचनमा पर्ने भएकाले त्यसका लागि चनाखो हुन महानगरका सभापतिहरूलाई कोइरालाले आग्रह गरे।
महानगरका सभापतिहरूले आफूहरूको पार्टीमा मर्यादाक्रम नमिलेको र विधानले कुनै अधिकार नदिएको गुनासो राखेका थिए। भेटघाटमा महानगर सभापतिहरू नीलकाजी शाक्य (काठमाडौँ), सुवानन्द धाख्वा (ललितपुर), चित्रसेन अधिकारी (भरतपुर), दीपक चापागाईं (विराटनगर) र मनिन्द्र नेपाली (वीरगन्ज) सहभागी थिए।
