हिमाल प्रेस 
काठमाडौँ- युरोपेली च्याम्पियन्स लिगको लिग चरणमा आर्सनलले अपराजित यात्रा कायम राखेको छ। आर्सनलले स्लाभिया प्राहलाई २-१ ले पराजित गरेको हो।
खेलको नवौँ मिनेटमा भिक्टर ग्योकेरेसले स्लाभियाको डिफेन्सपछाडि बल मिलाइदिएपछि नोनी माडुएकेले त्यसलाई सदुपयोग गर्दै गोल गरे ।
पहिलो हाफ सकिनुअघि ग्योकेरेस आफैँले गोल गरे। मिकेल मेरिनोसँग पास आदानप्रदान गरेपछि उनले उत्कृष्ट प्रहार गर्दै बललाई पोस्टमा लागेर जाली चुमाए ।
दोस्रो हाफमा स्लाभियाले खेलमा सुधार गरेको थियो । लगत्तै ओस्कार कुबियाकको बक्सबाहिरबाट आएको प्रहारलाई आर्सनलका गोलकिपर डेभिड रायाले उत्कृष्ट बचाउ गरे ।
कर्नरबाट आएको मोजमिर चिटिलको हेडरलाई गाब्रियल मागाल्हाएसले गोललाइनबाट क्लियर गरे । तर खेलको ९०औँ मिनेटमा विक्टर नोभाकले नजिकबाट गोल गर्दै स्लाभियाका लागि एक गोल फर्काए ।
गत सिजन च्याम्पियन्स लिगको यस चरणमा शतप्रतिशत जित निकालेको आर्सनल यस सिजन पनि चार खेलपछि अपराजित छ । टोली अंकतालिकामा पेरिस सेन्ट जर्मेन (पीएसजी) र रियल मड्रिडपछि तेस्रो स्थानमा रहेको छ।
