भारतबाट वर्षा प्रणाली नेपाल प्रवेश गर्दै

काठमाडौँ- भारतमा विकसित भएको वर्षा गराउने प्रणाली उत्तरपश्चिम दिशाबाट कोशी प्रदेश हुँदै नेपाल प्रवेश गर्न लागेको भन्दै जल तथा मौसम विज्ञान विभाग, मौसम पूर्वानुमान महाशाखाले सतर्क रहन आग्रह गरेको छ।

महाशाखाका अनुसार उक्त प्रणालीको प्रभावका कारण कोशी, मधेशलगायतका क्षेत्रमा वर्षा हुने सम्भावना रहेको छ।

हाल बागमती, गण्डकी र कर्णाली प्रदेशका थोरै स्थानमा तथा कोशी, लुम्बिनी, कर्णाली र सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको महाशाखाले जनाएको छ।

महाशाखाले वर्षासँगै हुन सक्ने जोखिमलाई ध्यानमा राख्दै आवश्यक सतर्कता अपनाउन सर्वसाधारणलाई आग्रह गरेको छ।