हिमाल प्रेस 
गोरखा- गोरखामा जिप दुर्घटना हुँदा ८ जना घाइते भएका छन्। घाइतेमध्ये दुई जनाको अवस्था गम्भीर रहेको नेपाल प्रहरीले जनाएको छ।
सिरानचोक गाउँपालिका-२ थालाजुङस्थित भित्री सडकखण्डमा आइतबार बिहान ग १ ज ६३८९ नम्बरको महेन्द्र जिप ब्रेक फेल भएर सडकको नालामा खसेको हो।
जिपमा चालकसहित ९ जना सवार थिए। दुर्घटनामा चालकबाहेक ८ जना घाइते भएको प्रहरीले जनाएको छ।
घाइतेहरूलाई उपचारका लागि प्रदेश अस्पताल आँपपिपल, गोरखा पठाइएको छ।
दुर्घटनामा सिरानचोक गाउँपालिका-२ काँउलेकी ८१ वर्षीया लालमाया गुरुङ र सिरानचोक-७ का ६८ वर्षीय कमलबहादुर घिमिरे गम्भीर घाइते भएका छन्।
त्यस्तै, सिरानचोक-७ की ४८ वर्षीया सीता पाण्डे, ४८ वर्षीय लोकबहादुर खड्का, ७३ वर्षीय कुलबहादुर सार्की, सिरानचोक-६ सिम्लेका ६८ वर्षीया सीता गुरुङ, सिरानचोक-७ डाँडागाउँकी २७ वर्षीया रोजिना नेपाली र उनकी २१ महिनाकी छोरी रेविका नेपाली मध्यम घाइते भएका छन्।
दुर्घटनाबारे प्रहरीले थप अनुसन्धान गरिरहेको जनाएको छ।
