हिमाल प्रेस 
काठमाडौँ- नाइमा मोबिलिटी एक्स्पोमा ५०० भन्दा बढी बुकिङ भएको छ। एथरको पछिल्लो विद्युतीय स्कुटर पोर्टफोलियो तथा दीर्घकालीन ग्राहक भरोसा निर्माणमा कम्पनीले दिएको प्राथमिकताप्रति नेपाली ग्राहकको सकारात्मक प्रतिक्रिया देखिएको हो।
६ दिनसम्म सञ्चालन भएको एक्स्पोमा एथरले आफ्ना नयाँ उत्पादन, प्रविधि र ग्राहक स्वामित्वसम्बन्धी सेवा तथा पूर्वाधार प्रदर्शन गरेको थियो। कम्पनीका अनुसार बुकिङ बढाउन मुख्य रूपमा प्रवर्द्धनात्मक योजनाभन्दा विद्युतीय सवारीको आधारभूत पक्ष ब्याट्री सुरक्षा, बिक्रीपछिको सेवा, चार्जिङ पूर्वाधार र प्रविधिमा जोड दिइएको थियो।
एथरले विद्युतीय सवारीको स्वामित्वप्रति ग्राहकमा विश्वास बढाउन ‘एटसेभेन्टी वारेन्टी’ ल्याएको छ। यसअन्तर्गत लागू हुने सर्तअनुसार ब्याट्रीमा ८ वर्ष वा ८० हजार किलोमिटरसम्मको सुरक्षा तथा ब्याट्रीको स्वास्थ्य कम्तीमा ७० प्रतिशत कायम रहने आश्वासन दिइएको कम्पनीले जनाएको छ।
विद्युतीय सवारी खरिद गर्दा ग्राहकले उठाउने प्रमुख प्रश्नमध्ये ब्याट्रीको दीर्घकालीन विश्वसनीयता पनि एक हो। एथरका अनुसार उक्त वारेन्टीले ग्राहकको यही चिन्ता सम्बोधन गर्न सहयोग गरेको छ।
कम्पनीले नेपालमा बिक्रीपछिको सेवा र चार्जिङ पूर्वाधारसमेत विस्तार गरिरहेको जनाएको छ। हाल नेपालभर १० भन्दा बढी आधिकारिक सर्भिस सेन्टर तथा ५० भन्दा बढी फास्ट चार्जिङ नेटवर्क रहेको एथरको दाबी छ।
कम्पनीका अनुसार नाइमा एक्स्पोमा देखिएको ग्राहकको प्रतिक्रियाले नेपाली उपभोक्ताको विद्युतीय सवारीप्रतिको अपेक्षा पनि परिवर्तन हुँदै गएको संकेत गरेको छ। ग्राहकले अब स्कुटर मात्रै नभई त्यससँग प्राप्त हुने सेवा, ब्याट्रीको भरोसा र समग्र स्वामित्व प्रणालीलाई समेत प्राथमिकतामा राख्न थालेका छन्।
एक्स्पोमा सार्वजनिक गरिएको एथर ४५० ओभरटोन सिरिज पनि ग्राहकको आकर्षणको केन्द्र बनेको थियो। नयाँ प्रविधि तथा अन्तरक्रियात्मक सुविधामार्फत एथरले विद्युतीय गतिशीलताको नयाँ अनुभव प्रस्तुत गरेको कम्पनीले जनाएको छ। ओभरटोन सिरिजका प्रमुख विशेषतामा ‘म्याजिक ट्विस्ट’, ‘इन्फिनाइट क्रुज’ र ‘भोइस अन एथर’ रहेका छन्।
‘म्याजिक ट्विस्ट’मार्फत थ्रोटलको सहज प्रयोगबाट पुनःऊर्जा प्राप्त गर्ने ब्रेकिङ प्रणाली नियन्त्रण गर्न सकिन्छ। ‘इन्फिनाइट क्रुज’ले लामो दूरीमा क्रुजिङलाई सहज र सरल बनाउन सहयोग गर्ने कम्पनीको भनाइ छ। त्यस्तै, ‘भोइस अन एथर’ले भ्वाइस कन्ट्रोल तथा कनेक्टेड प्रविधिमार्फत स्कुटरसँग थप प्राकृतिक रूपमा अन्तरक्रिया गर्ने सुविधा प्रदान गर्छ।
यी प्रविधिले एथरलाई विद्युतीय स्कुटरका रूपमा मात्र नभई प्रविधिमा आधारित मोबिलिटी प्लेटफर्मका रूपमा प्रस्तुत गरेको कम्पनीको दाबी छ।
एथरको पछिल्लो ४५० सिरिज तथा रिज्टा परिवारका अन्य मोडलले पनि एक्स्पोमा ग्राहकको ध्यान खिचेका थिए। कम्पनीले प्रदर्शनमार्फत प्रदर्शन क्षमता, आराम तथा दैनिक सहरी यात्राका लागि विभिन्न विकल्प प्रस्तुत गरेको थियो।
एथर नेपालका लागि नाइमा मोबिलिटी एक्स्पोमा प्राप्त ५०० भन्दा बढी बुकिङ बिक्रीको संख्याभन्दा पनि विद्युतीय सवारीप्रतिको बढ्दो विश्वासको संकेत भएको कम्पनीले जनाएको छ।
कम्पनीले भनेको छ,‘नाइमा मोबिलिटी एक्स्पोमा प्राप्त प्रतिक्रियाले ग्राहकहरू छोटो अवधिका अफरभन्दा अगाडि बढेर सोचिरहेका छन् भन्ने हाम्रो विश्वासलाई थप बलियो बनाएको छ। उनीहरू उत्पादन, ब्याट्री, सेवा र चार्जिङमा भरोसा तथा आफ्नो राइडिङ अनुभवलाई वास्तविक रूपमा सुधार गर्ने प्रविधि चाहन्छन्। ५०० भन्दा बढी बुकिङ त्यसै विश्वासको प्रतिबिम्ब हो।’
नेपालमा आफ्नो उपस्थिति विस्तार गर्दै एथरले प्रविधि, विश्वसनीयता र दैनिक प्रयोगमा सहजतालाई जोड दिँदै विद्युतीय सवारीको वातावरण निर्माणमा केन्द्रित रहने जनाएको छ।
नयाँ उत्पादन, विस्तार हुँदै गएको चार्जिङ नेटवर्क, बढ्दो सर्भिस पूर्वाधार र दीर्घकालीन ब्याट्री आश्वासनमार्फत नेपाली उपभोक्तालाई विद्युतीय सवारीमा रूपान्तरण सहज र विश्वसनीय बनाउने कम्पनीको लक्ष्य छ।
