हिमाल प्रेस 
विश्वकप सेमिफाइनलमा बुधबार इंग्ल्यान्ड र अर्जेन्टिनाबीचको खेलका लागि सुरक्षा व्यवस्था थप कडा पारिएको छ।
अन्तर्राष्ट्रिय फुटबलका सबैभन्दा चर्चित प्रतिस्पर्धामध्ये एक मानिने यी दुई टोली एटलान्टा स्टेडियममा आमनेसामने हुँदैछन्। साविक विजेता अर्जेन्टिनालाई पराजित गर्दै इंग्ल्यान्डले सन् १९६६ यता पहिलोपटक विश्वकपको फाइनल पुग्ने लक्ष्य राखेको छ।
एटलान्टा प्रहरीले दुई देशबीचको ऐतिहासिक तनावलाई ध्यानमा राखेको जनाएको छ। सन् १९८२ मा बेलायत र अर्जेन्टिनाबीच फकल्यान्ड युद्ध भएको थियो। ७४ दिनसम्म चलेको उक्त युद्धमा ६४९ अर्जेन्टिनी सैनिक, २५५ बेलायती सैनिक र तीन जना सर्वसाधारणको मृत्यु भएको थियो। बेलायती अधीनमा रहेको उक्त क्षेत्रलाई अर्जेन्टिनामा लास माल्भिनास भनिन्छ। अहिले पनि दुवै देशबीचको सार्वभौमिकताको विवादको विषय बनेको छ।
एटलान्टा प्रहरीले जारी गरेको विज्ञप्तिमा भनिएको छ,‘थप प्रहरी जनशक्ति र स्रोतसाधन परिचालन गरिसकिएको छ। ती खेलस्थल, मनोरञ्जन क्षेत्र र भीडभाड हुने स्थानहरूमा रणनीतिक रूपमा खटाइनेछन् ताकि सबैले सुरक्षित र रमाइलो वातावरणमा यो ऐतिहासिक खेलको आनन्द लिन सकून्। यी पूर्वतयारीका उपायहरू सर्वसाधारणको सुरक्षा, अपराध नियन्त्रण तथा स्थानीय बासिन्दा र आगन्तुकलाई सुरक्षित वातावरण सुनिश्चित गर्नका लागि अपनाइएका हुन्।’
अर्जेन्टिनाले अन्तिम १६ को खेलमा इजिप्टलाई ३-२ ले पराजित गरेपछि खेलाडीहरूले फकल्यान्ड टापु (लास माल्भिनास) तथा अर्जेन्टिनी फुटबलका महान खेलाडी डिएगो म्याराडोना र लियोनेल मेस्सीलाई उल्लेख गर्ने गीत गाएको भिडियो सार्वजनिक भएको थियो।
सन् १९८६ को विश्वकप क्वार्टरफाइनलमा म्याराडोनाले चर्चित ‘ह्यान्ड अफ गड’ गोल गर्दै अर्जेन्टिनालाई इंग्ल्यान्डविरुद्ध जित दिलाएका थिए। कप्तान मेस्सीले भने आफ्नो गौरवपूर्ण करियरमा पहिलो पटक विश्वकपमा इंग्ल्यान्डविरुद्ध खेल्दैछन्।
२४ वर्षपछि विश्वकपमा यी दुई टोलीबीच हुन लागेको भेटअघि अर्जेन्टिनाको युद्ध पूर्वसैनिक महासंघले समर्थकहरूलाई राजनीति होइन फुटबलमा ध्यान केन्द्रित गर्न आग्रह गरेको छ।
महासंघले जारी गरेको विज्ञप्तिमा भनिएको छ,‘सार्वभौमिकताको रक्षा अन्तर्राष्ट्रिय मञ्चमा कूटनीति, ऐतिहासिक सत्य र हाम्रो संविधानमा उल्लेख गरिएको शान्तिपूर्ण तथा अडानयुक्त दाबीमार्फत गरिन्छ। हामी खेलप्रतिको उत्साह र राष्ट्रिय मुद्दाबीच स्पष्ट र अडिग सीमा कायम गर्न आवश्यक ठान्छौं। बल मैदानमा गुड्छ, हाम्रो राष्ट्रिय रंगप्रतिको गर्व झन् बढ्छ तर इतिहासको सम्झना भने सधैं जीवित रहन्छ।’
यसैबीच, इंग्ल्यान्डका गोलरक्षक जोर्डन पिकफोर्डले यस खेललाई फुटबलको खेल भन्दै मैदानमा फुटबलले नै आफ्नो उत्तर दिनेछ भन्ने विश्वास व्यक्त गरेका छन्।
अमेरिकामा रहेका इंग्ल्यान्डका समर्थकहरूको व्यवहारको प्रहरीले प्रशंसा गरेको छ। तर बेलायतमा रहेका समर्थकहरूलाई पनि त्यही अनुशासन देखाउन आग्रह गरिएको छ। किनभने गत सप्ताहन्त फुटबलसँग सम्बन्धित ५०० भन्दा बढी घटना दर्ता भएका थिए।
