हिमाल प्रेस 
काठमाडौँ- हुम्ला जिल्लाको नाम्खा गाउँपालिका-१ निवासी एक गर्भवती महिलामा जटिल प्रसूति समस्या देखिएपछि उनको जीवनरक्षा गर्दै नेपाली सेनाले हवाई उद्धार गरेको छ।
महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयअन्तर्गत राष्ट्रिय महिला सशक्तीकरण परियोजनामार्फत सञ्चालन भइरहेको गर्भवती तथा सुत्केरी महिलाहरूको हवाई उद्धार कार्यक्रमअन्तर्गत उक्त उद्धार गरिएको हो।
नेपाली सेनाको सूचना तथा जनसम्पर्क निर्देशनालयका अनुसार असार ८ गते ती महिलालाई थप उपचारका लागि हवाई साधनमार्फत कर्णाली प्रदेश अस्पताल, सुर्खेतमा सुरक्षित रूपमा पुर्याइएको हो।
दुर्गम भौगोलिक अवस्थाका कारण स्वास्थ्य सेवामा पहुँच कठिन हुने क्षेत्रका गर्भवती तथा सुत्केरी महिलाहरूलाई आकस्मिक अवस्थामा सुरक्षित उपचार उपलब्ध गराउने उद्देश्यले यस्तो सेवा सञ्चालन हुँदै आएको छ।
यस उद्धारसँगै दुर्गम हिमाली जिल्लाका जोखिमपूर्ण प्रसूति अवस्थाका महिलाहरूको जीवनरक्षामा राज्यको आपतकालीन हवाई सेवा प्रभावकारी बन्दै गएको देखिएको छ।
सेनाको समन्वयमा गरिएको उद्धार कार्यले दुर्गम क्षेत्रमा स्वास्थ्य आपतकालीन सेवाको पहुँच विस्तारमा महत्वपूर्ण भूमिका खेलेको अधिकारीहरूले जनाएका छन्।
उद्धार गरिएकी महिलालाई हाल कर्णाली प्रदेश अस्पतालमा उपचार भइरहेको छ।
