जयशंकरकी छोरीसँग जोडिएको सुरक्षा घटनाले भारतको कूटनीतिक वृत्त तरंगित

इस्लामाबाद- भारतका परराष्ट्रमन्त्री एस जयशंकरको परिवारका एक सदस्यसँग युरोपमा भएको भनिएको सुरक्षा घटनाले भारतका उच्च कूटनीतिक व्यक्तित्वमध्ये एक मानिने जयशंकरमाथि असामान्य ध्यान केन्द्रित गराएको छ। यो घटना भारतको परराष्ट्र नीतिसम्बन्धी गतिविधि संवेदनशील अवस्थामा रहेका बेला सार्वजनिक भएको हो।

कूटनीतिक स्रोतहरूका अनुसार परराष्ट्रमन्त्री एस जयशंकरकी छोरी मेधा जयशंकर मे २०२६ मा निजी भ्रमणका क्रममा नर्वे पुगेकी थिइन्। उनी ओस्लोको सोफिएनबर्ग क्षेत्रमा बसेकी थिइन् र छोटो अवधिका लागि भाडामा आवास उपलब्ध गराउने प्लेटफर्ममार्फत बसोबासको व्यवस्था गरेकी थिइन्।

स्रोतहरूका अनुसार उक्त भ्रमण भारतका प्रधानमन्त्री नरेन्द्र मोदी नेतृत्वको प्रतिनिधिमण्डलले उच्चस्तरीय भारत–नर्डिक कूटनीतिक कार्यक्रममा सहभागिता जनाएलगत्तै भएको थियो।

उक्त भारत–नर्डिक संवादमा नर्वे, स्विडेन, डेनमार्क, फिनल्यान्ड र आइसल्यान्डसँग भारतको सम्बन्ध विस्तार गर्ने प्रयास समेटिएको थियो। प्रधानमन्त्री नेतृत्वको टोलीले व्यापार, प्रविधि र रणनीतिक सहकार्यका विषयमा शिखरस्तरीय बैठक तथा द्विपक्षीय वार्ताहरूमा सहभागिता जनाएको थियो।

उच्चस्तरीय प्रतिनिधिमण्डलमा प्रधानमन्त्री मोदीसँगै रहेका परराष्ट्रमन्त्री जयशंकरले औपचारिक कार्यक्रम सकिएपछि आफ्नो बसाइलाई निजी बनाएर छोरीसँग समय बिताएका थिए।

कूटनीतिक स्रोतहरूले दाबी गरेअनुसार मे २३ मा मेधा जयशंकर बसिरहेको आवासमा चोरी भएको थियो। उक्त घटनामा व्यक्तिगत सामान तथा विद्युतीय उपकरणहरू चोरी भएको बताइएको छ।

चोरी भएका सामग्रीमा झोला, ल्यापटप, राहदानी, मोबाइल फोन तथा अन्य व्यक्तिगत सामग्री समावेश रहेको स्रोतहरूको दाबी छ। साथै, त्यहाँ बसिरहेका परराष्ट्रमन्त्री जयशंकरसँग सम्बन्धित केही कूटनीतिक तथा संवेदनशील कागजातसमेत हराएको दाबी गरिएको छ।

यो विषयबारे भारतीय वा नर्वेली अधिकारीहरूले सार्वजनिक रूपमा विस्तृत जानकारी दिएका छैनन्। नर्वेस्थित भारतीय दूतावासले प्रशासनिक प्रक्रियामार्फत यसलाई शान्त ढंगले व्यवस्थापन गरेको बताइएको छ।

औपचारिक विवरण सार्वजनिक नगरिएकाले कूटनीतिक तथा सञ्चारमाध्यम वृत्तमा विभिन्न अड्कलबाजीहरू बढेको स्रोतहरूको भनाइ छ। भारतीय वा नर्वेली पक्षबाट कुनै सार्वजनिक वक्तव्य नआएकाले घटनाबारे अझै अन्योल कायम रहेको बताइएको छ।

परराष्ट्रमन्त्री जयशंकर भारतको विदेश नीतिको केन्द्रमा रहेका कारण तथा उनका अन्तर्राष्ट्रिय गतिविधिहरूप्रति उच्च संवेदनशीलता रहेकाले यो घटनाले अप्रत्यक्ष रूपमा उनीमाथि पनि थप ध्यान आकर्षित गरेको कूटनीतिक स्रोतहरूको भनाइ छ।

भारतको परराष्ट्र मन्त्रालयले यी दाबीहरूबारे कुनै आधिकारिक टिप्पणी गरेको छैन। विन्युजबाट