हिमाल प्रेस 
भारतको कोलकातामा चर्चित फुटबल खेलाडी लियोनेल मेस्सीको ७० फिट अग्लो मूर्ति हटाइने भएको छ। स्थापना गरिएको पाँच महिनापछि पश्चिम बंगाल सरकारले सुरक्षासम्बन्धी कारण देखाउँदै उक्त मूर्ति हटाउन लागेको भारतीय सञ्चारमाध्यमले उल्लेख गरेका छन्।
२५ मेमा कोलकाताका स्थानीय बासिन्दाले सार्वजनिक निर्माण विभागलाई तीव्र हावा लाग्दा मूर्ति हल्लिएको गुनासो गरेका थिए। त्यसपछि विभागका अधिकारीहरू स्थलगत निरीक्षणमा पुगे र मूर्ति हटाउनुपर्ने निष्कर्ष निकालेका हुन्।
विभागका एक अधिकारीले भने, ‘हामीलाई मानिसहरूबाट उजुरी आएपछि हाम्रो टोलीले निरीक्षण गर्यो। भविष्यमा कुनै दुर्घटना नहोस् भन्ने हाम्रो चाहना हो, त्यसैले यसलाई हटाउने योजना बनाइएको छ।’
फुटबलका महान् खेलाडी मेस्सीप्रति अत्यधिक लोकप्रियताका कारण उनका समर्थकहरूले उनलाई २०२२ फिफा विश्वकप ट्रफी उठाइरहेको स्वरूपमा सुनौलो रङको मूर्ति निर्माण गरेका थिए। उक्त मूर्ति नाइलन डोरीले बाँधिएको छ र भीड तथा ट्राफिक नियन्त्रणका लागि वरिपरि बार लगाइएको छ।
कोलकातामा मेस्सीप्रतिको फ्यान क्रेज अत्यधिक छ। जसलाई ‘मेस्सी मेनिया’ पनि भनिन्छ। सहरमा फुटबलप्रतिको उत्साह फ्यान जोन, ठूला स्थापना र भित्तेचित्रमा स्पष्ट देखिन्छ।
उक्त मूर्ति २७ दिनमा निर्माण गरिएको थियो। गत डिसेम्बरमा मेस्सीको भारत भ्रमणका क्रममा अनावरण गरिएको थियो। तर भ्रमणका क्रममा असहज परिस्थिति उत्पन्न भएको थियो। मेस्सी कार्यक्रमबाट छिट्टै निस्किएपछि दर्शकहरूले बोतल फ्याँक्ने र रंगशालाको गेट तोड्ने प्रयास गरेका थिए।
कोलकाता प्रशासनले मूर्तिका लागि नयाँ स्थान खोजिरहेको छ। सामाजिक सञ्जाल एक्समा भने यस विषयमा मिश्रित प्रतिक्रिया आएका छन्। केहीले मूर्ति मेस्सीसँग मिल्दैन भनेका छन्।
एक प्रयोगकर्ताले लेखेका छन्, ‘यो मेस्सी होइन… यो त कुनै साधारण भारतीय व्यक्ति जस्तो देखिन्छ जसले विश्वकप समातेको छ।’
