हिमाल प्रेस 
काठमाडौँ- नेपाली कांग्रेस संसदीय दलको नेता चयनका लागि यही वैशाख ११ गते मतदान हुने भएको छ। कांग्रेस संसदीय दलको नेता निर्वाचन समितिले सोमबार निर्वाचन कार्यक्रम जारी गरेको हो।
निर्वाचन कार्यक्रमअनुसार वैशाख ९ गते दिउँसो विधान तथा निर्वाचन निर्देशिकासम्बन्धी सांसदहरूसँग छलफल राखिएको छ। त्यसको भोलिपल्ट वैशाख १० गते दिउँसो १ बजे मतदाता नामावली प्रकाशन गर्ने तालिका रहेको छ।
वैशाख ११ गते बिहान ११ देखि १२ बजेसम्म उम्मेदवारी दर्ताको समय तोकिएको छ। अपराह्न साढे ३ बजे उम्मेदवारको अन्तिम नामावली प्रकाशन गर्ने निर्वाचन कार्यक्रम छ।
त्यसपछि अपराह्न ४ बजेदेखि बेलुका ५ बजेसम्म मतदानको समय तोकिएको छ। मतदान सकिए लगत्तै मतगणना हुने निर्वाचन समितिका संयोजक प्रकाश रसाईली स्नेहीले जनाएका छन्।
दलको नेतामा अर्जुननरसिंह केसी, भीष्मराज आङ्देवेलगायत आकांक्षी छन्।
प्रकाशित: ७ वैशाख २०८३ १८:३८ | Monday, April 20, 2026
प्रतिक्रिया
