तलब माग्न बालेनको कार्यालयमा पुगे शिक्षकहरू

काठमाडौँ- नेपाल शिक्षक महासंघ काठमाडौँ महानगरपालिका समितिले शिक्षकहरूले पाँच महिनादेखि तलब नपाएको भन्दै महानगरका मेयर बालेन्द्र शाह (बालेन) लाई ध्यानाकर्षण पत्र बुझाएको छ।

महानगरमा प्रमुख प्रशासकीय अधिकृतको पद रिक्त भएकाले नगरको शिक्षक कर्मचारीलाई तलब प्राप्त भएको छैन। महानगरका ३ हजार ६०० कर्मचारी मध्ये ७०० बढी शिक्षकहरू छन्।

तलब नपाउँदा घरव्यवहारमा समस्या भएको शिक्षकहरूले बताका छन्। उनीहरूले चाँडो तलबको व्यवस्था गरिदिन आग्रह गरेका छन्।

शिक्षकहरूले पत्रमा भनेका छन्, ‘काठमाडौँ महानगरपालिका शिक्षा विभागबाट विद्यालयहरूमा तलब निकासा नहुँदा सामुदायिक विद्यालयका शिक्षक तथा कर्मचारीहरूले पाँच महिनादेखि तलब पाउन सकेका छैनन्। लामो समयदेखि तलब नपाउँदा शिक्षकहरू कोठा भाडा तिर्न नसकेर, दैनिक उपभोग्य वस्तु खरिद गर्न नसकेर र नियमित औषधि उपचार गर्न नपाएर समस्यामा पर्नुभएको छ।’