हिमाल प्रेस 
शव निकाल्दै सुरक्षाकर्मीहरू
काठमाडौँ- झ्याप्ले खोला पहिरोमा पुरिएको गोरखाको बसभित्र पाँचजनाको शव भेटिएको छ। शुक्रबार जिल्लाको धार्चे गाउँपालिकाको लापुबेँसीबाट काठमाडौँका लागि छुटेको उक्त बस धादिङको झ्याप्ले खोलामा पुरिएको थियो। पुरिएको बसबाट पाँचजनाको शव निकालिएको गोरखा दरौँदी यातायात सेवा प्रालिका अञ्जन खत्रीले जानकारी दिए।
आज आइतबार उद्धारका क्रममा बेपत्ता भएको भनिएको ना ४ ख २२७० नम्बरको बस र भीमसेन थापा गाउँपालिका-४का बसका धनी तथा चालक मदन परियारको शव पहिचान भएको छ। खत्रीका अनुसार सहचाल धावाका विनय भट्टराई र फुजेलका नवराज तिवारीको शव फेला परेको छ।
दुईजना यात्रुमध्ये एकजना धार्चे गाउँपालिका- ७ खानीगाउँका २७ वर्षीय सुकबहादुर गुरुङ रहेको त्यहाँका वडाअध्यक्ष राकेश गुरुङले पुष्टि गरेका छन्। अर्का यात्रु सुकबहादुरकै सम्पर्कमा मुग्लिनबाट उक्त बसमा चढेका व्यक्ति भएको बताइएको छ। उनको पहिचान खुलेको छैन।
