हिमाल प्रेस 
काठमाडौँ- नइ प्रकाशनले काठमाडौँमा देश तथा विदेशका २२ जना प्रतिभालाई २०७९ सालको ‘नइ पुरस्कार’ प्रदान गरेको छ।
नइ प्रकाशनका कुलपति इन्दिरा प्रसाईले छ दशकअघिदेखि नारीहरूको स्वास्थ्यसेवा, स्वास्थ्योपचारको जागरण र विकासमा समर्पित प्रसूति विशेषज्ञ प्रा.डा.सरस्वती पाध्येलाई ‘नइ भावि पुरस्कार’ प्रदान गरे। ताम्रपत्रसहित सो पुरस्कारको राशि एक लाख रुपैयाँ रहेको छ।
समारोहमा प्रसुति विशेषज्ञ प्रा.डा. पाध्येले देशविदेशका नौ जनालाई ताम्रपत्र र जनही एक लाख रूपैयाँ राशिसहित २०७९ सालका नइ पुरस्कार समर्पण गरे।
नेपाली वाङ्मयको श्रीवृद्धिका लागि सिर्जना र सङ्गठन मार्फत निरन्तर जागरूक र समर्पित हुँदै नेपाली भाषासाहित्यको अन्तर्राष्ट्रिय विस्तारमा महत्त्वपूर्ण योगदान पुर्याउने भारतीय नेपाली प्राज्ञ नव सापकोटालाई दुई लाख रूपैयाँ राशिसहित ‘नइ देरुनीख अन्तर्राष्ट्रिय पुरस्कार’ प्रदान गरियो।
त्यस्तै भारतीय साहित्यकार स्नेहलता राईलाई ‘नइ गणेशदुर्गा अन्तर्राष्ट्रिय पुरस्कार’, देशभक्त चिन्तक डा.भेषबहादुर थापालाई ‘नइ कीर्तिनिधि पुरस्कार’ शिक्षाविद् प्रा.जर्ज जोनलाई नइ भूपालदुर्गा पुरस्कार, खेलकुदका लागि कुमार मोहनबहादुर शाहीलाई ‘नइ भाजप पुरस्कार’, चित्रकारिताका लागि कृष्णगोपाल रञ्जितलाई ‘नइ यउजा पुरस्कार’, पत्रकार हरिहर बिरहीलाई ‘नइ देरुनीख सुकीर्ति पुरस्कार’, धर्म तथा संस्कृतिमा प्राज्ञिक योगदानका लागि कमल रिजाललाई ‘नइ चन्द्रधन पुरस्कार’, साहित्यकार श्रीओम श्रेष्ठलाई ‘नइ ईश्वरवल्लभ पुरस्कार’ र काठमाडौँ उपत्यकाबाहिर रहेर नेपाली भाषासाहित्यको सिर्जना र संवर्धनमा विशिष्ट योगदान पुर्याएबापत स्याङ्जाका विश्वप्रेम अधिकारीलाई ‘नइ धनरूप पुरस्कार’ प्रदान गरियो।
यसै गरी ताम्रपत्रसहित ६० हजार रुपैयाँ राशिको ‘नइ देरुनीख प्रदीप्ति पुरस्कार’ हास्यव्यङ्य मार्फत जनचेतना जगाउने शैलेन्द्र सिम्खडा, ५० हजार रुपैयाँ राशिको ‘नइ बुलु शर्मा पुरस्कार’ झापाका रीमा पाण्डेलाई र २५ हजार रुपैयाँ राशिसहित ‘नइ देरुनीख पौरख पुरस्कार’ मिस नेवा नीतु डङ्गोललाई प्रदान गरिएको थियो।
प्रा.डा.सरस्वती पाध्येले छ जना बाल बालिकालाई दस हजार रुपैयाँ राशि र ताम्रपत्रसहित ‘नइ देरुनीखपू बाल पुरस्कार’ समर्पण गरिन्। पुरस्कृत हुनेहरूमा बहुआयामिकतर्फ आयुषा लम्साल, साहित्यतर्फ कुञ्जल शुभेच्छु लुइँटेल, चित्रकलातर्फ रेजिना बोहोरा, संगीततर्फ ईशा प्रजापति, नृत्यतर्फ कृष्मा ढुङ्गाना र खेलकुदतर्फ आहाना कार्की थिए।
यसै गरी सात हजार रुपैयाँ राशि र ताम्रपत्रसहित ‘नइ देरुनीखपू कोपिला पुरस्कार’ ऋषिका घिमिरे र ताम्रपत्रसहित पाँच हजार रुपैयाँ राशिको ‘नइ देरुनीखपू चिचिला पुरस्कार’ चार वर्षीय श्रेस्मी दाहाललाई प्रदान गरियो।
नइ प्रकाशनका कुलपति इन्दिरा प्रसाईको सभापतित्वमा सञ्चालित सो समारोहमा पुरस्कृतमध्ये नव सापकोटा, प्रा.डा.सरस्वती पाध्ये र श्रीओम श्रेष्ठ तथा नइ प्रकाशनका सदस्यसचिव नरेन्द्रराज प्रसाईले मन्तव्य राखे। समारोहमा शैलेन्द्र सिम्खडाले अभिनयका साथ कविता प्रस्तुत गरे भने पुरस्कृत बालबालिकाले गायन तथा नृत्य प्रदर्शन गरे।
