हिमाल प्रेस 
काठमाडौँ साफ यू-१६ महिला फुटबल च्याम्पियनसिपमा आज घरेलु टोली नेपालले भारतको सामना गर्दैछ। ललितपुरको एन्फा कम्प्लेक्समा खेल दिउँसो ३ बजे सुरु हुनेछ।
यो खेल जित्ने टोली फाइनल प्रवेश गर्ने हुँदा दुवै टोली जितसहित बंगलादेशसँगको उपाधि भिडन्त पक्का गर्ने लक्ष्यमा हुनेछन्। दुवै टोलीले समान २-२ खेल खेल्दा १ जित र १ हार बेहोरेका छन्।
पहिलो खेलमा बंगलादेशसँग २-० ले स्तब्ध भएको नेपालले दोस्रो खेलमा भुटानलाई ३-० ले पराजित गरेको थियो।
भारतले भुटानलाई ७-० ले पराजित गर्दा बंगलादेशविरुद्ध ३-१ को हार बेहोरेको थियो। सुरुवाती दुवै खेल जितिसकेको साविक उपविजेता बंगलादेश फाइनल पुगिसकेको छ।
उसले प्रतियोगिताबाट बाहिरिसकेको भुटानसँग खेल्न बाँकी छ।
नेपाल प्रतियोगिताको साविक विजेता हो।
प्रकाशित: २४ फागुन २०८० ९:१७
प्रतिक्रिया
