दर्शक नपाउँदा बन्द छ लमजुङको एक मात्र सिनेमा हल

लमजुङ- लमजुङ बेँसीसहर नगरपालिका-८ मा रहेको जिल्लाको एकमात्र चलचित्र भवन अन्नपूर्ण हल तीन हप्तादेखि बन्द भएको छ। दर्शक आउन छाडेकाले हल बन्द गरिएको सञ्चालक प्रदीप बस्नेतले बताए।

बन्द हुनुअघिसम्म हिन्दी चलचित्र सलार प्रर्दशन गरिएको थियो। सो चलचित्रले पनि दर्शक तान्न सकेन। २७३ सिट क्षमताको यो हलमा विगतमा सहरबजारबाट मात्र नभई ग्रामीण भेगबाट पनि दर्शक आउँदा ‘हाउस फुल’ हुन्थ्यो।

सञ्चालक बस्नेतका अनुसार चलचित्र हेर्ने युवापुस्ता वैदेशिक रोजगारीमा गएका तथा स्वदेशमा रहेकाहरूले पनि इन्टरनेटको अधिकतम प्रयोग गर्दै चलचित्रको मनोरञ्जन वैकल्पिक रूपमा लिन थालेपछि हलमा आएर सिनेमा हेर्ने दर्शकको संख्या ह्वात्तै घटेको छ।

हल बन्द गर्नुपर्दा दैनिक पाँच हजार घाटा हुने गरेको दुखेसो उनले गरे। ‘हल बन्द छ तर तीन जना कर्मचारीलाई मासिक तलब दिएर राखेको छु,’ आगामी शुक्रबारदेखि दयाहाङ राई अभिनित नेपाली चलचित्र ‘दयारानी’ र ‘हात्तीछाप’ देखाउने योजनामा रहेको उनले बताए। उनले उक्त चलचित्रले दर्शन तान्ने अपेक्षा आफूले गरेको बताए।

२०४५ मा यस हल स्थापना भएको थियो। विगतमा जिल्लामा यो हल बाहेक सुन्दरबजार, भोटेओडार, भोर्लेटार, सोतीपसललगायत स्थानमा हलहरू सञ्चालनमा थिए। सुन्दरबजारमा रहेको शान्ति चलचित्र हल सात वर्ष अघिदेखि पूर्णरुपमा बन्द छ।