हिमाल प्रेस 
मध्यविन्दु (नवलपरासी)- नारायणी नदीमा पहिलो पटक भएको साहसिक खेल कायाकिङ राष्ट्रिय प्रतियोगितामा उदयपुरका डम्बरबहादुर पूर्वथाने पहिलो भएका छन्।
गण्डकी प्रदेश खेलकुद परिषद्ले नवलपरासी (बर्दघाट सुस्तापूर्व) को नारायणी नदीमा अयाोजना गरेको कायाकिङ प्रतियोगितामा सहभागी १८ प्रतिस्पर्धीलाई उछिन्दै उनी पहिलो भएका हुन्।
डम्बरबहादुरले सात किलोमिटरको दूरी ३५ मिनेट ३८ सेकेन्डमा पूरा गरे। यस्तै गोर्खाका दिपेश रानामगर निर्धारित दूरी ३६ मिनेट १० सेकेन्डमा पार गरी दोस्रो भए।
चितवनका विजय गुरुङ ३७ मिनेट २१ सेकेण्डमा दूरी पार गरी तेस्रो भएको गण्डकी प्रदेश खेलकुद परिषद्का सदस्य सचिव श्रीधर शर्माले जानकारी दिए। प्रतियोगितामा प्रहिलो, दोस्रो र तेस्रो हुने खेलाडीले क्रमशः ४० हजार, २५ हजार र १५ हजार रुपैयाँ पुरस्कार प्राप्त गरे।
आगामी वर्ष असोजमा अन्तर्राष्ट्रिय प्रतियोगिता सञ्चालन गरिने प्रशिक्षक निमबहादुर मगरले बताए। नेपालमा कायाकिङ गर्ने २०० भन्दा बढी खेलाडी रहेको उनको भनाइ छ। डुंगामा एक जना मात्र बस्न मिल्ने गरी खेलिने कायाकिङ साहसिक खेल विधामा पर्दछ।
