हिमाल प्रेस 
फाइल तस्बिर- रासस
चितवन– चितवनको इच्छाकामना गाउँपालिका-१ का चेपाङ समुदायलाई फलफूलका बिरुवासहित अम्रिसोको बिरुवा वितरण गरिएको छ।
उनीहरूको आयआर्जन बृद्धि, वातावरण संरक्षण र भू-क्षय नियन्त्रणको लागि सुन्तला, कागती र अम्रिसोको बिरुवा वितरण गरिइएको हो। इच्छाकामना-१ भालुडाँडामा आयोजित कार्यक्रममा स्थानीय ५२ परिवार चेपाङलाई ७१ हजार ७ सय ५० सुन्तलाको बिरुवा, ५२ परिवारलाई ४ सय ५० कागतीका बिरुवा तथा १ सय ४ परिवारलाई ५ हजार ५० बोट अम्रिसो वितरण गरिएको इम्प्याक्टका अध्यक्ष ध्रुव गिरीले जानकारी दिए।
सो वडाअन्तर्गत काउलेमा सुन्तला उत्पादन हुँदै आएको छ। स्थानीय आवश्यकतालाई मध्यनजर गरि सुन्तलाको बिरुवा वितरण गरिइएको हो।
सो ठाउँमा अम्रिसो बहुउपयोगी मानिँदै आएको छ। कुचोको लागि, बाख्राको लागि घाँस र डोको बुन्न चोयासमेत निस्कने भएकाले अम्रिसोको बिरुवा प्रदान गरिएको हो। बाख्रापालन, कुचो तथा भू-क्षय नियन्त्रण र वातावरण संरक्षणको लागि अम्रिसो उपयोगी हुने गर्दछ।
‘पछिल्लो समय चेपाङको पारिवारिक अवस्थामा परिवर्तन आएको छ। बालबालिका स्कुल जान थालेका छन्,’ अध्यक्ष गिरीले भने, ‘आयआर्जनको लागि बाख्रापालन गरिएको छ, खेतमा तरकारी र फलफूल उत्पादन गरिएको छ।’
