हिमाल प्रेस 
काठमाडौँ- नेपाली कांग्रेसका केन्द्रीय सदस्य तथा सांसद विनोद चौधरीले वस्तु निर्यातबाट व्यापार घाटाको खाडल पुर्न असम्भव रहेको बताएका छन्।
मंगलबारको प्रतिनिधिसभा बैठकमा आउँदो आर्थिक वर्षका लागि विनियोजन विधेयकका सिद्धान्त र प्राथमिकतामाथि बोल्दै सांसद चौधरीले व्यापार घाटाको बढ्दो खाडल पुर्न विद्युत् निर्यात एउटा सशक्त माध्यम बन्न सक्ने बताएका हुन्।
‘जलविद्युत्का उत्पादन र निर्यातका उत्कृष्ट मोडलहरू देश सामु आएका छन्। व्यापारघाटाको बढ्दो क्रमलाई धान्न नसक्ने अवस्थामा पुगेको र यो खाडल पुर्न एउटा सशक्त माध्यम बन्न सक्छ। वस्तुको निर्यातबाट यो खाडल पुर्न असम्भव छ,’ उनले भने, ‘हाम्रो प्राथमिकता सकेसम्म विद्युत् नेपालमै खपत होस भन्ने हुनुपर्छ। त्यसका लागि नेपाललाई एसएमई साना तथा घरेलु उद्योग तथा अर्काेतर्फ २१औँ शताब्दीको क्रिप्टो माइण्डको हब बनाउँन सकिन्छ। यसका लागि गुणस्तरीय विद्युत्को आवश्यकता पर्छ।’
व्यापार घाटा कम गर्ने कोसेढुङ्गाको रूपमा क्रिप्टोलाई वैधानिकता दिन सकिने पनि उनले बताए।
