कोशी : हस्ताक्षर गरेका सदस्यहरूको सनाखत गरेर मात्रै मुख्यमन्त्री नियुक्ति

इटहरी– कोशी प्रदेश प्रमुख परशुराम खापुङले प्रदेशसभा सदस्यहरूको सनाखत गरेर मात्रै मुख्यमन्त्री नियुक्त गर्ने तयारी गरेका छन्। यसका लागि दुवै दाबीकर्ताका समर्थनमा हस्ताक्षर गरेका प्रदेशसभा सदस्यहरूलाई शनिबार बिहान ८ बजेदेखि दिउँसो २ बजेसम्म परिचय खुल्ने परिचयपत्रका साथ प्रदेश प्रमुखको कार्यालयमा सनाखत गर्न भनिएको छ।

मुख्यमन्त्रीमा कांग्रेस संस्थापन पक्ष, नेकपा माओवादी केन्द्र, नेकपा एकीकृत समाजवादी लगायतका दलले माओवादीका इन्द्र आङ्बो र नेपाली कांग्रेसको डा. शेखर कोइराला समूह र नेकपा एमालेको समर्थनमा कांग्रेसका केदार कार्कीले दाबी पेस गरेका छन्। केही सांसदहरूको हस्ताक्षर दुवैतिर देखिएपछि प्रदेश प्रमुख खापुङले सनाखत गर्ने तयारी गरेका हुन्।

माओवादीका आङ्बो र डा. शेखर समूहका कार्कीले ४७/४७ सदस्यहरूको समर्थन रहेको भनेर हस्ताक्षरसहित मुख्यमन्त्रीमा दाबी पेस गरेका थिए।