हिमाल प्रेस 
फाइल तस्बिर।
ओखलढुंगा– ओखलढुंगामा आँखा उपचार सेवा प्रभावकारी बन्दै गएको छ। जिल्ला सामुदायिक आँखा केन्द्र र गाउँपालिका स्तरमा सञ्चालित उपचार सेवा केन्द्रबाट उपलब्ध हुने सेवाबाट जिल्लाका गाउँगाउँका नागरिकले सेवा पाएका हुन्।
६ महिनायता ४ हजार ७ सय २५ जनाको आँखाको उपचार गरिएको छ। आँखा जाँच, औषधि तथा चस्मा वितरण सेवालाई जिल्लामा सञ्चालित अस्पताल र पालिकास्तरमै पुर्याइएको छ।
जीवनभर कहिल्यै आँखा परीक्षण नगरेकाले समेत आँखा जाँच गराएर सेवा लिएका छन् भने आँखा नदेख्ने कतिपय शल्यक्रियापछि आँखा देख्ने भएका जिल्ला सामुदायिक आँखा केन्द्रका प्रमुख टीका राईले जानकारी दिए।
केन्द्रबाट २ हजार ९ सय २२, ओखलढुंगा सामुदायिक अस्पतालमा रहेको केन्द्रबाट ६ सय ६९, खिजीदेम्बाको ग्रामीण आँखा केन्द्रबाट ५ सय १२, मोतिराज ग्रामीण आँखा केन्द्र मानेभञ्ज्याङबाट ३ सय ४१ र लिखु ग्रामीण आँखा केन्द्रबाट २ सय ८१ जनाले आँखाको उपचार गराएको उनले बताए।
यस्तै केन्द्रले विगत ६ महिनामा ३८ लाख ५६ हजार आम्दानी गरेको छ। सेवा उपलब्ध गराउँदा ३३ लाख खर्च भएको प्रमुख राईले जानकारी दिए। सत्र वर्ष अघि स्थापना भएको उक्त केन्द्रमा सेवा लिनेको संख्या बर्सेनि वृद्धि हुँदैगएको छ।
मासिक झण्डै ६ सयको हाराहारीमा सेवाग्राही उपचारका लागि आउने गरेका छन्। जिल्लामा आँखा जाँच तथा उपचार सेवा प्रभावकारी बन्दै गएको सिद्धिचरण नगरपालिकाका निवर्तमान मेयर एवम् रेडक्रसका पूर्वसभापति मोहन श्रेष्ठले बताए।
उनकै पहलमा जिल्लामा सामुदायिक आँखा उपचार केन्द्र स्थापना भएको हो।
‘हाल गाउँगाउँमा सेवा पुगेको छ,’ श्रेष्ठले भने। विद्यार्थीको आँखा जाँच तथा उपचार कार्यक्रमलाई जिल्लाका सबै स्थानीय तहले अवलम्बन गर्नुपर्ने उनको भनाइ छ। जीदेम्बा, मानेभञ्ज्याङ, लिखुलगायतका स्थानीय तहले आँखा केन्द्र स्थापना गरेर सेवा प्रवाह थालेका छन्।
