धौलागिरी हिमपातमा बेपत्ता व्यक्तिको शव काठमाडौँ ल्याइयो

काठमाडौँ- गत वर्ष (२०७९) असोज २० गते धौलागिरी हिमालमा भएको हिमपातमा हराएका माउन्टेन गाइड रामबहादुर तामाङको शव काठमाडौँ ल्याइएको छ। गत वर्ष असोज ५ गते कोरियाली नागरिक लिएर धौलागिरी हिमाल आरोहण गर्न गएका तामाङ २० गते परेको भारी हिमपातका कारण हराएका थिए।

शनिबार (२०८० वैशाख ३०) धौलागिरी बेसक्याम्पबाट नेपाली सेनाको हेलिकप्टरमार्फत उनको शव काठमाडौँ ल्याइएको नेपाली सेनाले जानकारी दिएको छ। उनी हराएको थाहा पाएपछि त्यही बेलादेखि नै उनको खोजी कार्य गरिए पनि मौसम प्रतिकुललगायत कारण कठिनाई भएको नेपाली सेनाको भनाइ छ।

पछिल्लो पटक नेपाली सेनाको सहयोगमा शेर्पा आरोहीहरू सम्मिलित टोलीले वैशाख २८ र २९ गते खोज्ने क्रममा करिब ५ हजार मिटर उचाइमा तामाङको शव भेटिएपछि २९ गते बेसक्याम्प ल्याइएको सेनाको भनाइ छ।