हिमाल प्रेस 
नयाँ दिल्ली- भारत २०२३ पछि पहिलोपटक आईसीसी टि-२० विश्वकपमा पराजित भएको छ। टी-२० विश्वकपको सुपर-८ चरणअन्तर्गत अहमदाबादस्थित नरेन्द्र मोदी क्रिकेट मैदानमा आइतबार साँझ भएको खेलमा दक्षिण अफ्रिकाले भारतलाई ७६ रनले हराउँदै भारतको लगातार १२ खेलको विजयी यात्रामा ब्रेक लगाएको हो।
यो हार रन अन्तरका हिसाबले टी-२० अन्तर्राष्ट्रियमा भारतको दोस्रो ठूलो हार हो। खेलमा भारतीय बलर जसप्रीत बुमराहले ३ विकेट लिँदै भारतका लागि टी-२० विश्वकप इतिहासमा सबैभन्दा धेरै विकेट लिने भारतीय बलरको कीर्तिमान बनाएका छन्। दक्षिण अफ्रिकाका डेविड मिलरले ६३ रन बनाउँदै २६ बलमा अर्धशतक पूरा गरे।
टी-२० विश्वकप इतिहासमा यो भारतको तेस्रो सबैभन्दा कम स्कोर पनि हो। दक्षिण अफ्रिकाविरुद्ध भारत १११ रनमा अलआउट भएको थियो।
यसअघि भारतको सबैभन्दा कम स्कोर २०१६ मा न्युजिल्यान्डविरुद्ध ७९ रन थियो भने २०२१ मा दुबईमा भएको खेलमा पनि न्युजिल्यान्डले भारतलाई ११०/७ मा रोकिदिएको थियो।
यस हारसँगै २०२३ वनडे विश्वकप फाइनलमा अस्ट्रेलियासँग पराजित भएपछि सुरु भएको आईसीसी इभेन्टको १८ खेलको अपराजित यात्रा पनि टुंगिएको छ।
मल्टी-नेशन टी-२० अन्तर्राष्ट्रिय प्रतियोगितामा भने भारत २०२२ टी-२० विश्वकप सेमिफाइनलमा इंग्ल्यान्डसँग पराजित भएपछि पहिलोपटक हारेको हो।
यस क्रममा भारतले २३ खेलमध्ये २१ खेल जितेको थियो भने एक खेल सुपर ओभरमा जितेको थियो र एक खेल नतिजाविहीन बनेको थियो।
यसबीच वरुण चक्रवर्तीले टी-२० अन्तर्राष्ट्रियमा लगातार १८ इनिङ्समा विकेट लिएर नयाँ कीर्तिमान कायम गरेका छन्। उनले अर्शदीप सिंहको १७ इनिङ्सको कीर्तिमान तोडेका हुन्।
ब्याटिङतर्फ डेविड मिलर भारतविरुद्ध टी-२० अन्तर्राष्ट्रियमा सबैभन्दा धेरै छक्का प्रहार गर्ने खेलाडी बनेका छन्। उनले २६ इनिङ्समा ३९ छक्का प्रहार गर्दै ग्लेन म्याक्सवेलको ३८ छक्काको कीर्तिमान तोडेका हुन्।
मिलरले २६ बलमा अर्धशतक प्रहार गर्दै भारतविरुद्ध चौथो सबैभन्दा छिटो अर्धशतक पनि बनाएका छन्। यसभन्दा अघि लिटन दासले २१ बल, हेनरिक क्लासेनले २३ बल र ट्राभिस हेडले २४ बलमा अर्धशतक बनाएका थिए। दैनिक भास्कर
