गायक प्रकाश सपुतलाई जन्मथलाेमा दर्शककाे साथ

बागलुङ- गायक तथा अभिनेता प्रकाश सपुत शनिबार साँझ आफ्नो जन्मथलो बागलुङका दर्शकमाझ प्रस्तुत भए। बागलुङ महोत्सवको क्रममा उनलाई बागलुङ उद्योग वाणिज्य संघ मञ्चमा उभ्याएको हो।

सप्तान्हतको साँझ गीतसंगीतप्रेमी दर्शक सपुतका गीतमा झुमे, रमाए। डेढ घण्टा बढी प्रस्तुति दिएका गायक सपुतले आफ्ना चर्चित गीत ‘बोलमाया’ देखि ‘गलबन्दी’ सम्म प्रस्तुत गरे।

‘नमस्कार’ बोलको गीतसँगै मञ्चमा देखा परेका उनले ‘दोहोरी ब्याटल’ सँगै आफ्नो प्रस्तुतिको मैजारो गरे। छिपिँदो रातसम्म सपुतलाई दर्शकले साथ दिए। दुई वर्षपछि उनले आफ्नो गृहथलोमा प्रस्तुति दिएका हुन्।। सपतुले ‘पिर’, ‘फूलमाया’, ‘मेरो पनि होइन र’ लगायत गीत सुनाए। सपुतले आफूद्वारा अभिनित फिल्मका गीतसमेत गाएका थिए। उनको गायन र प्रस्तुतिमा दर्शक मन्त्रमुग्ध देखिन्थे।

स्वस्थ मनोरञ्जनदेखि सामाजिक विषयवस्तुका गीत सिर्जनामा पारङ्गत सपुतले आफ्नो सांगीतिक सफलताको श्रेय बागलुङलाई जाने बर्ता। उनले बागलुङको परिवेश, हावापानी, संस्कार र संस्कृति नै आफ्नो सिर्जनाको स्रोत रहेको उल्लेख गरे। उनको प्रस्तुति सुन्न प्रौढदेखि बालबालिकासम्म महोत्सवस्थल पुगेका थिए।

बागलुङको काठेखोला गाउँपालिका-३ धम्जामा जन्मिएका सपुत गायन र अभिनय कलामा पोख्त छन्। उनको निर्माण तथा निर्देशनमा बनेको फिल्म ‘वसन्त’ गत वर्ष प्रदर्शनमा आएको थियो। उनले ‘पूर्णबहादुरको सारङ्गी’, हरिबहादुरको जुत्ता’, ‘माइतीघर’ लगायत फिल्ममा अभिनय गरेका छन्। सपुतसँगै शनिबार गायक कुमार पुन, गायिका टीका पुनलगायतका कलाकारले महोत्सवमा प्रस्तुति दिएका थिए।

गत पुस ११ गतदेखि सुरु भएको महोत्सव सोमबारसम्म सञ्चालन हुनेछ। महोत्सवका अवधिभर विभिन्न कलाकारहरूको प्रस्तुति रहने महोत्सव मूल आयोजक समितिका संयोजक एवं बागलुङ उद्योग वाणिज्य सङ्घका अध्यक्ष राजनकुमार शाक्यले बताए।

महोत्सवमा खुला प्रदेशस्तरीय पुरुष तथा महिला भलिबल, खुला राष्ट्रिय दोहोरीगीत प्रतियोगिता, पञ्चेबाजा प्रदर्शनी तथा प्रतियोगिता, भोले छुने प्रतियोगिता, सामूहिक नृत्य, वक्तृत्वकला, लठो तान्ने, घैँटौफोर, तारो हान्नेलगायत विविध खेलकुद प्रतियोगिता आयोजना गरिएको छ।

महोत्सवमा फोटो प्रदर्शनी, सांस्कृतिक झाँकी, स्थानीय खाना प्रवर्द्धन, सुन्तला, माछाको प्रदर्शनी, हस्तकला, कृषि तथा पशु, औद्योगिक उत्पादन, स्थानीय जडीबुटी, सूचना प्रविधि आदिको प्रदर्शनी तथा बिक्री कक्ष रहेको अध्यक्ष शाक्यले बताए। रासस