हिमाल प्रेस 
पोखरा– पर्यटकीय राजधानी पोखरामा रोपाइँ महोत्सवलाई निरन्तरता दिएको पोखरा पर्यटन परिषद्को दाइँ महोत्सव पनि सफल हुँदै गएको छ।
पर्यटनमा टेवासहित परम्परागत कृषि प्रणालीको प्रवद्र्धन गर्ने उद्देश्यले परिषद्ले शनिबार पोखराको उत्तरी भेग वडा–१९, चुरुङ्गामा दोस्रो संस्करणको दाइँ महोत्सव आयोजना गरेको हो।
महोत्सव अवलोकन गर्न पुगेका विदेशी पर्यटक भने निकै रमाए। उनीहरुले नेपालको परम्परागत खेती प्रणालीको निकै चाख मानेर हेरे।
दाइँ वास्तवमा कृषि उपज भित्र्याउने क्रममा परम्परागत ढंगले नै गोरुको सहायतामा धानको पराललगायत माड्ने कार्यलाई बुझिन्छ। मूल रूपमा धान झारी सकेपछि बाँकी रहेको धान समेत झार्ने र कुन्यू लगाइएको पराल खलामा बिच्छ्याएर त्यसमाथि गोरुलाई लहरै दाम्लो वा डोरीले बाँधेर दाइँमा घुमाउने गरिन्छ।
पोखरा महानगरपालिकाका प्रमुख धनराज आचार्यले परालको कुन्यू चढेर कार्यक्रम उद्घाटन गरेका थिए। उनले यस्तो महोत्सवबाट कृषकलाई कृषि पेसामा लागिरहन प्रेरणा मिल्ने विश्वास व्यक्त गरे।
पोखरा पर्यटन परिषद् अध्यक्ष तारानाथ पहारीले महोत्सवबाट पर्यटन प्रवद्र्धनसहित कृषकलाई प्रोत्साहन एवं नयाँ पुस्तालाई परम्परागत कृषि प्रणालीबारे जानकारी मिल्न टेवा मिल्ने बताए।
पोखरा महानगरपालिका आर्थिक विकास महाशाखा प्रमुख मनहर कडरियाले महानगरले पोखराको पहिचान बोकेको जेठोबुढो लगायत धान ब्राण्डिङ गरिरहेको बताए। उनका अनुसार रैथाने जातका धानहरूको संरक्षणका लागि कृषकलाई महानगरले मल, बिउमा अनुदान दिने गरेको छ।
यसपालि सबैभन्दा धेरै धान फलाउने कृषकलाई महोत्सव अवसरमा सम्मानसमेत गरियो। पोखरा महानगरको निरीक्षण र मूल्यांकन आधारमा उत्कृष्ट धान उत्पादनक कृषक छनोट गरिएको हो। जसमा पोखरा १९ का फवेन्द्रप्रसाद गुरुङले पाँच सय मुरी धान फलाएकोमा उनलाई १० हजार प्रदान गरियो।
यस्तै, एक सय मुरी धान उत्पादन गर्ने वडा १९ कै कृषक मिलन गुरुङलाई सात हजार र ९८ मुरी धान उत्पादन गर्ने पोखरा २३ का कृषक बालकृष्ण भण्डारीलाई पाँच हजार प्रदान गरियो।
यसैगरी गोरुपालक कृषक जीवन बास्तोलालाई छ हजारसहित सम्मान गरियो। दाइँ महोत्सवको आकर्षण बढाउन धान चुट्ने, गुन्द्री बुन्ने, परालको भारी बाँध्नेलगायत प्रतियोगिता पनि भए।
धान चुट्ने प्रतियोगितामा कृषक श्याम भुजेल प्रथम भए। जीवनाथ सुवेदी दोस्रो र विष्णुप्रसाद पौडेल तेस्रो भए। उनीहरुले क्रमशः नगद तीन हजार, दुई हजार र एक हजार प्राप्त गरे।
परालको भारी बाँध्ने प्रतियोगितामा अग्निधर गौतम र भीम विक, नवीन र अभिषेक बास्तोला तथा कुलबहादुर भुजेल र तारानाथ गौतमको जोडीलाई क्रमशः नगद ३ हजार, २ हजार र १ हजार प्रदान गरियो।
गुन्द्री बुन्नेमा लक्ष्मी देवकोटा र लक्ष्मी बास्तोलाको जोडी, सीता गौतम र विष्णु गौतमको जोडी तथा लक्ष्मी अधिकारी र अञ्जना अधिकारीको जोडीलाई क्रमशः तीन हजार, दुई हजार र एक हजार प्रदान गरियो।
पोखरा महानगरपालिकाले सघाएको महोत्सवको स्थानीय व्यवस्थापन चुरुङ्गा टोल विकास संस्थाले गरेको स्थानीय संयोजक उमनाथ गौतमले बताए।
आयोजक परिषद्का प्रथम उपाध्यक्षसमेत रहेका कार्यक्रम संयोजक हरिबहादुर भुजेलले महोत्सवमा आयोजकले अपेक्षा गरेभन्दा बढी दर्शक आएको बताए। आगामी वर्षमा पनि महोत्सवलाई निरन्तरता दिने उनले बताए।
परिषद्कै आयोजनामा हुने रोपाइँ महोत्सवको २१ औं संस्करण पूरा भइसकेको छ।
