हिमाल प्रेस 
काठमाडौँ– नेकपा (एमाले) को पोलिटब्युरो बैठक शनिबार पनि जारी छ। ललितपुरको च्यासलस्थित एमाले मुख्यालयमा प्रधानमन्त्री एवम् पार्टी अध्यक्ष केपी शर्मा ओलीको अध्यक्षतामा बैठक सुरु भएको हो।
बैठकमा उपाध्यक्ष विष्णुप्रसाद पौडेलले प्रस्तुत गरेको विधान संशोधन प्रस्तावमाथि पोलिटब्युरो सदस्यहरुले आफ्नो धारणा राख्ने कार्यतालिका छ।
प्रचार विभाग प्रमुख राजेन्द्र गौतमका अनुसार शुक्रबार बोल्न बाँकी पोलिटब्युरो सदस्यहरुले विधान संशोधन प्रस्ताव प्रतिवेदनमाथि धारणा राख्नेछन्। शुक्रबार सात जना पोलिटब्युरो सदस्यले विधान संशोधनमाथि धारणा राखेका थिए।
विधान संशोधन प्रस्तावमा पार्टीको विधान (२०७८ संशोधन) को धारा ६४ मा रहेको ७० वर्ष उमेर हद र दुई कार्याकाल व्यवस्था हटाउने राखिएको छ। साथै पदाधिकारी संख्या १५ जनासहित केन्द्रीय कमिटीको संख्या २५१ रहने तथा स्थायी कमिटी, पोलिटब्युरो कमिटी र केन्द्रीय कमिटी गरी तीन तह रहने व्यवस्था गरिएको छ।
प्रचार विभाग प्रमुख गौतमका अनुसार पार्टीको पदाधिकारी संख्यालाई स्थायी कमिटी मान्ने प्रस्ताव गरिएको छ। यसअघि पदाधिकारीलाई सचिवालय सदस्यको रुपमा मानिएको थियो। विधान महाधिवेशन केन्द्रीत पोलिटब्युरो बैठक शनिबार सम्पन्न गर्ने कार्यतालिका रहेको उनले बताए।
एमालेको विधान महाधिवेशन आगामी भदौ २० देखि २२ गतेसम्म ललितपुरको गोदावरीस्थित सनराइज अन्तर्राष्ट्रिय सम्मेलन केन्द्रमा हुने तालिका छ।
