राहुघाट नदी कटान रोक्न ‘कम्पोजिट’ प्रविधिको पर्खाल

म्याग्दी- राहुघाट नदी कटानको जोखिममा रहेको म्याग्दीको बेनी नगरपालिका-९ गलेश्वर, रघुगंगा गाउँपालिका-३ राहुघाट, कालीगण्डकी करिडोरको सडक र मोटरेबल पुल संरक्षण गर्न तटबन्ध निर्माण भएको छ।

राष्ट्रिय गौरवको कालीगण्डकी करिडोर, बेनी-जोमसोम-कोरला सडक योजनाले सडक, पुल र बस्ती संरक्षणका लागि तीन करोड ३९ लाख ८६ हजार ८२३ रुपैयाँको लागतमा नदी किनारमा ‘कम्पोजिट’ प्रविधिको पर्खाल निर्माण गरेको हो।

पर्खाल निर्माणपछि सडक, मोटरेबल पुल, गलेश्वर र राहुघाटको बस्तीमा बाढी र कटानको जोखिम न्यूनीकरण भएको बेनी नगरपालिका-९ का वडाध्यक्ष चक्र केसीले बताए।

राहुघाटको कटानका कारण गलेश्वर, राहुघाटका करिब ५० घरपरिवार, एक सय मिटर सडक र मोटरेबल पुल जोखिममा परेको थियो।

राहुघाट नदी किनारमा राहुघाट बस्तीतर्फ ५० मिटर ‘पलम पर्खाल’ र गलेश्वरतर्फ ८५ मिटर ‘कम्पोजिट’ पर्खाल निर्माण भएको योजना कार्यालयले जनाएको छ। गत फागुनदेखि सुरु भएको योजना निर्धारित समयमै सम्पन्न भएको हो।

नदीमा आउने बाढीलाई नियन्त्रण गर्न चार मिटर चौडाइ भएको तीनतीन मिटर अग्लो कंक्रिट र त्यसमाथि छ तहमा ग्याविन पर्खाल निर्माण भएको छ।

चार करोड ७२ लाख ३७ हजार ४६४ रुपैयाँलागत अनुमान गरिएको योजना निर्माणका लागि गत फागुन १३ गते महाप्रभु-विआरटी साय जेभीसँग ठेक्का सम्झौता भएको थियो।

निर्माण कम्पनीका प्रतिनिधि शिव जीसीले रातको समयमा पनि मजदूर र उपकरण परिचालन गरेर नदीमा पानीको सतह बढ्नुअघि नै तटबन्ध गरेको बताए। बेनी-गलेश्वर सडकअन्तर्गत गलेश्वरमा पनि नदी कटानबाट सडकलाई जोगाउन तटबन्धन निर्माण भएको बेनी-जोमसोम-कोरला सडक योजनाका इञ्जिनियर विष्णु चापागाईँले बताए।