ताप्लेजुङमा गाउँका मतपेटिका हेलिकप्टरमार्फत ल्याउने तयारी

काठमाडौँ– ताप्लेजुङका हिमाली गाउँका मतपेटिकाहरू सोमबार मात्र सदरमुकाम ल्याउने तयारी भएको छ। फक्ताङलुङ गाउँपालिकामा पर्ने हिमाली बस्तीहरू घुन्सा, ग्याब्ला, यांमा र ओलाङचुङगोलाका मतपेटिका सोमबार बिहान हेलिकप्टरमार्फत ल्याउने तयारी भएको मुख्य निर्वाचन अधिकृत निर्मला योङ्याले जानकारी दिए।

भौगोलिकरूपमा विकट यी ठाउँमा पैदल हुँदै पुग्न चार दिनसम्म लाग्ने भएकाले हेलिकप्टरमार्फत मतपेटिका ओसार्नुपर्ने बाध्यता रहेको हो। फक्ताङलुङ गाउँपालिका-७ स्थित याङ्मा पुग्न नै सदरमुकामबाट चार दिनको समय लाग्छ।

यसअघि सो ठाउँमा आइतबार सम्पन्न निर्वाचन गराउन गएको कर्मचारीको टोली चार दिनमा मात्र पुगेको थियो। यी चार मतदान केन्द्रका मतपेटिका हेलिकप्टरमार्फत ल्याउन निर्वाचन आयोग र गृह मन्त्रालयसँग समन्वय भएको जनाइएको छ। निर्वाचन सकिएलगत्तै ल्याउन साँझको समय पर्ने भएकाले सोमबार ल्याउने तयारी भएको प्रमुख जिल्ला अधिकारी महेश पोखरेलले जानकारी दिए।

करिब चार हजार दुई सय मिटरको उचाइमा पर्ने याङ्माको मतदान केन्द्रमा ६१ मतदाता छन्। यहाँ आइतबार भएको निर्वाचनमा १२ मत खसेको बताइएको छ। यहाँ करिब ४१ प्रतिशतको हाराहारीमा मतदान भएको अनुमान गरिएको छ। वास्तविक तथ्यांक भने संकलन भइरहेको निर्वाचन कार्यालयले जनाएको छ।

जिल्लामा कूल मतदातामध्ये पुरुष ४७ हजार ८० र महिला ४१ हजार दुई सय पाँच रहेका छन्। जम्मा एक सय २३ वटा मतदान केन्द्रबाट निर्धारित समयमा नै मतदान सुरु भएको थियो। प्रतिनिधिसभा सदस्य पदमा नेकपा एमालेका योगेश भट्टराई र गठबन्धनका तर्फबाट नेकपा माओवादी केन्द्रका खेल बुढाथोकी ‘पराग’बीच मुख्य प्रतिस्पर्धा छ।

यस्तै प्रदेशसभा क्षेत्र (१) मा एमालेका तिलकुमार मेन्याङ्बो र गठबन्धनका तर्फबाट नेकपा एकीकृत समाजवादीका खेम वनेमबीच प्रतिस्पर्धा छ। यस्तै प्रदशसभा क्षेत्र (२) मा एमालेका गोपाल थोप्रा र गठबन्धनबाट नेपाली कांग्रेसका खगेनसिं हांमाबीच प्रतिस्पर्धा छ। संघ र प्रदेशमा गरी २६ जना उम्मेदवार चुनावी प्रतिस्पर्धामा छन्।