हिमाल प्रेस 
काठमाडौँ- एसिसी पुरुष यु-१६ पूर्वी क्षेत्रीय क्रिकेट प्रतियोगितामा नेपालले सिंगापुरलाई पराजित गर्दै प्रतियोगितामा सुखद् सुरुवात गरेको छ। मलेसियाको युकेएम ओभल क्रिकेट मैदानमा सम्पन्न खेलमा नेपालले सिंगापुरमाथि ६ विकेटले जित निकालेको हो।
जितका लागि एक सय ३९ रनको लक्ष्य पछ्याएको नेपालले ३३ दशमलव तीन ओभरमा चार विकेट गुमाएर पूरा गर्यो। नेपालका लागि ओपनर प्रसिद्ध जैसीले सर्वाधिक ५५ रनको योगदान गरे। उनले ९७ बलमा पाँच चौकाको सहयोगमा ५५ रन जोडेका हुन्। रौनक श्रीवास्तवले ४० रन बनाए।
सिंगापुरका लागि आकाश तेजाले तीन विकेट लिए भने युभान पाण्डेले एक विकेट झारेका हुन्। त्यसअघि टस जितेर पहिला ब्याटिङ रोजेको सिंगापुले ३६ दशमलव एक ओभरमा सबै विकेट गुमाउँदै एक सय ३८ रनको योगफल बनाएको थियो।
सिंगापुरका लागि कप्तान रियन नायकले सर्वाधिक ५३ रनको योगदान गरे। ओपनर आहान भुधानभामले ३८ रन बनाउँदा अर्का ओपनर रोशन अरुनले ११ रन जोडे।
नेपालका लागि कप्तान विपिन शर्माले चार विकेट लिए भने सचिन भट्टले तीन विकेट झारे। त्यसैगरी शुभम खनाल र अभय यादवले समान एक/एक विकेट लिए। यो जितसँगै नेपालले दुई अंक बटुलेको छ।
अब नेपालले आफ्नो दोस्रो खेल यही असार १० गते जापानसँग खेल्नेछ। एसियाली क्रिकेट परिषद् (एसिसी) को वार्षिक कार्यतालिका अनुसार सञ्चालन भएको उक्त प्रतियोगितामा विभिन्न १० टोलीको सहभागिता छ।
प्रतियोगितामा नेपाल समूह ‘ए’ मा छ। नेपालको समूहमा सिंगापुर, इण्डोनेसिया, भुटान र जापान छन्। त्यस्तै समूह ‘बी’ मा आयोजक मलेसियासहित हङकङ, माल्दिभ्स, थाइल्याण्ड र म्यानमार छन्।
