अदालतको आदेश स्मरण गराउँदै ललितपुर महानगरले दियो शिक्षकहरूलाई यस्तो निर्देशन

काठमाडौँ– ललितपुर महानगरपालिकाले मंगलबारदेखि नियमित पठनपाठन, विद्यार्थी भर्नासहितका शैक्षणिक क्रियाकलाप पूर्ण रूपमा सञ्चालन गराउन सामुदायिक विद्यालयलाई निर्देशन दिएको छ।

२७ दिनदेखि शिक्षकहरू आन्दोलित हुँदा विद्यार्थी भर्नासहितका शैक्षिक गतिविधि ठप्प छन्। महानगरपालिकाले शिक्षकहरूको सहभागितामा तयार पारेको शैक्षिक सत्र २०८२ को शैक्षिक कार्यपात्रोबमोजिम शैक्षिक क्रियाकलापहरू सञ्चालन हुन नसक्दा गम्भीर ध्यानाकर्षण भएको जनाएको छ।

महानगरपालिकाले सबै सामुदायिक विद्यालयलाई सम्बोधन गरी सोमबार गरेको परिपत्रमा उल्लेख छ, ‘विद्यालय सञ्चालनका सन्दर्भमा सम्मानित सर्वोच्च अदालतबाट देशभरका बालबालिकालाई विद्यालयमा नियमित पठनपाठन गर्न पाउने हकबाट वञ्चित नगर्नु, नगराउनु भनी भएको आदेशबमोजिम यस महानगरपालिकाअन्तर्गतका सबै सामुदायिक विद्यालयहरू मिति २०८२/१/१६ बाट नियमित पठनपाठन, विद्यार्थी भर्नातगायतका शैक्षणिक क्रियाकलाप पूर्ण रूपमा सञ्चालन गर्नु गराउनु हुन अनुरोध छ।’