हिमाल प्रेस 
काठमाडौँ- काठमाडौँ महानगरपालिकाका प्रमुख प्रशासकीय अधिकृत सरोज गुरागाईं बिहीबार सुरक्षा घेरा तोड्दै कार्यालयभित्र प्रवेश गरेका छन्। गुरागाईं काममा फर्किने भएपछि कार्यालय परिसरमा महानगर प्रहरी परिचालन गरिएको थियो। नगरका कर्मचारी र वडाध्यक्षहरू उपस्थित रहेका बेला वातावरण तनावग्रस्त बनेको थियो।
महानगरपालिकाका केही कर्मचारीहरूले गुरागाईंलाई निरन्तरता दिनुपर्ने माग गर्दै संघीय सरकार र मेयर बालेन शाहको निर्णयप्रति असन्तोष व्यक्त गरे। एक महिला कर्मचारीले भनिन्, ‘कर्मचारीमाथि अन्याय गरिएको छ। संविधानविपरीत जाने अधिकार कसैलाई छैन। यो व्यवस्थागत अन्याय हो।’
त्यस्तै, अर्का कर्मचारीले भने, ‘यदि गुरागाईं दोषी छन् भने कानुनी प्रक्रियाबाट कारबाही गर्नुपर्छ। सामाजिक सञ्जालको स्टाटसकै आधारमा निर्णय लिनु गलत हो।’
काठमाडौँ महानगरपालिकाले गुरागाईंमाथि आर्थिक अनियमितताको आरोप लगाएको छ। मेयर बालेन शाहले केही दिनअघि फेसबुक स्टाटसमार्फत गुरागाईंमाथि भ्रष्टाचारको आरोप लगाएका थिए। तर, महानगरकै कर्मचारी नरबहादुर कर्मचार्यले भने, ‘महानगरको निर्णय कानुनी प्रक्रियाबाट आउनुपर्छ, फेसबुक स्टाटसकै भरमा चल्दैन।’
