सामूहिक खेतीको लहर, ताप्लेजुङमा १४० रोपनीमा मकै उत्पादन सुरु

ताप्लेजुङ- ताप्लेजुङका किसान क्रमशः सामूहिक खेतीप्रति आकर्षित भइरहेका छन्। मिक्वाखोला गाउँपालिका-२ का किसानले सूर्यज्योति कृषक समूह गठन गरी सामूहिक मकैखेती थालेका छन्। समूहमा आवद्ध १२ परिवारले १४० रोपनी जमिनमा मकैखेती गरिरहेका छन्।

स्थानीय किसान इन्द्रकुमारी तामाङका अनुसार पहिले किसानहरू आ–आफ्नो इच्छाअनुसार विभिन्न प्रकारका बालीनाली लगाउने गर्थे। कसैले आलु, कसैले धान, कसैले कोदो वा मकैखेती गर्थे। तर अहिले योजनाबद्ध रूपमा सामूहिक खेती गर्ने प्रवृत्ति बढ्दै गएको छ।

प्रधानमन्त्री कृषि आधुनिकीकरण परियोजना कार्यान्वयन एकाइले मकै जोन कार्यक्रमअन्तर्गत ५० प्रतिशत अनुदान दिएपछि किसानहरूले सामूहिक खेती सुरु गरेका हुन्। कृषक समूहका सचिव दिवाकर बस्नेतका अनुसार माटो परीक्षणपछि खेती सुरु गरिएको हो। समूहले १६ लाख रुपैयाँ लगानी गरेको छ जसको ५० प्रतिशत किसानहरूले बेहोरेका छन् भने बाँकी आधा अनुदान प्राप्त गरेका छन्।

समूहले रामपुर हाइब्रिड–१६ र मनकामना–३ जातका उन्नत मकै लगाएको छ। परियोजनाका प्रमुख काशीराम पाण्डेका अनुसार चक्लाबन्दी कार्यक्रमअन्तर्गत किसानलाई आधुनिक कृषियन्त्र प्रयोग गर्ने ज्ञान तथा खेती प्रविधिबारे तालिम दिइन्छ।

सूर्यज्योति कृषक समूहका अध्यक्ष देवेन्द्र गुरागाईंका अनुसार आगामी वर्षहरूमा मकै उत्पादनलाई अझ व्यावसायिक बनाउने योजना छ। स्थानीय बजारसँगै राष्ट्रिय बजारमा बिक्री गर्ने र आधुनिक कृषि प्रविधि अपनाउने सोचका साथ किसानहरू अगाडि बढिरहेका छन्। समूहले कृषि पर्यटन प्रवर्द्धन गर्दै अन्य किसानलाई पनि सामूहिक खेतीमा आकर्षित गर्ने लक्ष्य राखेको छ।